مێژووی 47 ساڵەی تیپی هونەرە میللییەکانی هەولێر لە کتێبێکی بەڵگەنامەیی بڵاو دەکرێتەوە

کتێبێکی نوێ بە مەبەستی تۆمارکردن و بەڵگەکردنی مێژوو، چالاکی و دەستکەوتەکانی تیپی هونەرە میللییەکانی هەولێر، کە لەلایەن سیروان عوسمان، نووسەر و بەڕێوەبەری گشتی رۆشنبیری و هونەری هەولێر نووسراوە، بڵاودەکرێتەوە و دەڵێت، " لە کتێبەکەدا بە شێوەیەکی بەڵگەنامەیی و مێژوویی باس لە رۆڵی ئەم تیپە لە پاراستن و گەشەپێدانی هەڵپەڕکێ، گۆرانی و هونەرە میللییەکانی کورد دەکەم."

ئەمڕۆ سێشەممە، 11ی ئابی 2026، سیروان عوسمان، نووسەر و بەڕێوەبەری گشتی رۆشنبیری و هونەری هەولێر بە کوردستان24ی راگەیاند، "ئەم کتێبە بە پێشەکیی ئومێد خۆشناو، پارێزگاری هەولێر دەست پێدەکات و دواتر لە چەند بەشێکی سەرەکی، مێژووی کەلەپوور و هونەری میللی، دامەزراندنی تیپی هونەرە میللییەکانی هەولێر، چالاکی و پێشکەوتنەکانی، رۆڵی تیپەکە لە مێژووی هەڵپەڕکێی کوردی و بەڵگە و یادەوەرییە مێژووییەکانی دەخەمەڕوو."

گوتیشی، "کتێبەکە لە بەشی یەکەمدا بە شێوەیەکی گشتی دەچێتە ناو چەمکی کەلەپوور و هونەری میللی و گرنگیی کەلەپووری ناماددی لە پاراستنی ناسنامەی نەتەوەیی دەخەمەڕوو. هەروەها مێژووی هەڵپەڕکێ و گۆرانیی میللی لە کوردستان وەک بەشێک لە میراتی رۆشنبیریی گەلی کورد باس دەکەم."

سیروان عوسمان باس لە بەشەکانی دیکەی کتێبەکە دەکات و دەڵێت، "لە بەشی دووەمدا، سەرنج دەخەمەسەر بارودۆخی کۆمەڵایەتی و رۆشنبیریی ئەو سەردەمەی کە تیپی هونەرە میللییەکانی هەولێر دامەزراوە و مێژووی دامەزراندن، ئامانج و پەیام، یەکەم ئەندامان و شێوازی رێکخستنی تیپەکە بەڵگەدار دەکەم."

دەربارەی مێژووی تیپی هونەرە میللیەکانی هەولێر، سیروان عوسمان دەڵێت، "تیپی هونەرە میللییەکانی هەولێر لە ساڵی 1979 دامەزراوە و لەو کاتەوە بە بەشداری لە بۆنە و چالاکییە هونەری و کلتوورییەکان، هەوڵی داوە هونەرە میللییەکانی کوردستان بپارێزێت و بە نەوەکانی داهاتوو بگەیەنێت. هەروەها ئەم کتێبە تەنیا تۆمارکردنی مێژووی تیپێکی هونەری نییە، بەڵکو هەوڵێکە بۆ پاراستنی بەشێک لە یادەوەریی کولتووری و هونەریی کوردستان."

ئەوەشی گوت، "کەلەپوور گەورەترین سامانی رۆحی و ناسنامەی هەر نەتەوەیەکە و هەڵپەڕکێی کوردی یەکێکە لە رەسەنترین و زیندووترین دەربڕینەکانی ناسنامەی گەلی کورد؛ بۆیە تۆمارکردنی مێژووی ئەو دامەزراوە هونەرییەی ساڵانێک لە پاراستنی ئەم میراتەدا رۆڵی هەبووە، گرنگییەکی تایبەتی هەیە."

سیروان عوسمان باس لە بەشی سێیەمی کتێبەکە دەکات و دەڵێت، "بەشی سێیەمی کتێبەکە تایبەتە بە پێشکەوتن و چالاکییەکانی تیپەکە، لەوانە گەشت و شانۆ و پێشانگە، بەشداری لە فێستیڤاڵە ناوخۆیی و نێودەوڵەتییەکان و رۆڵی هونەرمەند و مامۆستایانی دیار لە پەرەپێدانی تیپەکە. هەروەها تیپی هونەرە میللییەکانی هەولێر لە ماوەی چەندین دەیەدا تەنیا پێشکەشکاریی هونەری نەبووە، بەڵکو بووەتە شوێنێک بۆ فێرکردن و پەروەردەکردنی نەوەی نوێی هونەرمەندان و گواستنەوەی ئەزموون و زانیارییە کۆنەکان بۆ نەوەی نوێ."

سیروان عوسمان باسی لەوەش کرد، "لە بەشی چوارەمدا، تایبەتمەندییە هونەرییەکانی تیپ، جلوبەرگی میللی، مۆسیقای کوردی و کاریگەریی تیپەکە لەسەر جیلی نوێی هەڵپەڕکێکاران و هونەرمەندان لێکدەدرێتەوە و بەراوردێک لەگەڵ تیپەکانی تری هونەرە میللییەکان دەخەمەڕوو."

ئەو نووسەرە باس لە یەکێک لە بەشە گرنگەکانی کتێبەکە دەکات و دەڵێت، "یەکێک لە بەشە گرنگەکانی کتێبەکەش بەڵگە و یادەوەرییەکانە. بەڵگەنامە فەرمییەکان، نامە و بڕیارەکان، وێنە مێژووییەکان، پۆستەر و بەرنامە کۆنەکان و خشتەی کاتی چالاکییەکانی تیپەکەم کۆکردۆتەوە تاکو خوێنەر بتوانێت بە بەڵگەی بینراو و نووسراوەوە شوێن پێی مێژووی ئەم تیپە بکەوێت."

 سیروان عوسمان باس لە ئامانجی سەرەکی نووسینی ئەو کتێبە دەکات و دەڵێت، "ئامانجی سەرەکیی ئەم کارە تەنیا نووسینی ساڵنامەیەکی رووداوەکان نییە، بەڵکو هەوڵدانە بۆ تێگەیشتن لە رۆڵی تیپەکە لە پاراستنی کەلەپووری کوردی، گەشەسەندنی هەڵپەڕکێ، پەروەردەکردنی هونەرمەندان و ناساندنی ناسنامەی کولتووریی کوردی لە ناوخۆ و دەرەوەی وڵات."

دەربارەی پشت بەستن بە سەرچاوە و بەڵگە جۆراوجۆرەکان بۆ نووسینی ئەو کتێبە، سیروان عوسمان دەڵێت، "کتێبەکەم بە پشتبەستن بە سەرچاوە و بەڵگە جۆراوجۆرەکان ئامادەکردووە؛ لەوانە بەڵگە و ئەرشیفی بەڕێوەبەرایەتی گشتی رۆشنبیری و هونەری هەولێر، بەڵگەنامە و دۆکیۆمێنتە فەرمییەکان، چاوپێکەوتن لەگەڵ دامەزرێنەران و هونەرمەندانی تیپ، لەوانە هیمداد لەشکری، هەروەها گۆڤار و رۆژنامە و بڵاوکراوە رۆشنبیرییەکان."

گوتیشی، "لە سەرچاوەکانی دیکەی کتێبەکە، کتێب و توێژینەوە ئەکادیمییە پەیوەندیدارەکان بە کەلەپوور، هەڵپەڕکێ و هونەری کوردی و کتێبی "سەمای فریشتەکان"، لە نووسین و ئامادەکردنی عەبدولعەزیز مەجیدم بەکارهێناوە. لە کۆتایی کتێبەکەدا، بابەتی دەستکەوتەکان، ئاستەنگ و کێشەکانی رێگەی هونەری میللی، ئایندەی هونەرە میللییەکان و کۆمەڵێک ئەنجام و پێشنیارم خستۆتەڕوو."

سیروان عوسمان ئاماژەی بەوەش دا، "تیپی هونەرە میللییەکانی هەولێر لە ماوەی نزیکەی پێنج دەیەدا هەوڵی داوە کەلەپووری هونەری و میللیی کوردستان بپارێزێت و لە رێگەی نمایش، مۆسیقا و هەڵپەڕکێوە ئەم میراتە بە ناوخۆ و دەرەوەی وڵات بناسێنێت. هەروەها  کەلەپوور تەنیا میراتی رابردوو نییە، بەڵکو پەیامێکە بۆ داهاتوو؛ بۆیە پێویستە مێژوو و بەرهەم و ئەزموونی دامەزراوە هونەرییەکان بە شێوەیەکی زانستی و بەڵگەدار تۆمار بکرێت."

 بڵاوکردنەوەی ئەم کتێبە هەنگاوێکە بۆ بەڵگەکردنی مێژووی تیپی هونەرە میللییەکانی هەولێر و پاراستنی ئەو بەشە گرنگەی لە میراتی هونەری و کولتووریی کوردستان کە لە ماوەی چەندین دەیەدا لەلایەن هونەرمەندان و مامۆستایانی ئەم تیپەوە پارێزراوە و بە نەوەکان گەیەندراوە.