ئۆزگور ئۆزەل: با کەس ئێمە بانگهێشتی لای ئەردۆغان نەکات
ئۆزگور ئۆزەل لە وەڵامی بانگەوازەکەی دەم پارتیدا بۆ پێداچوونەوە بە بڕیاری بەشدارینەکردن لە کۆمسیۆنی چاودێریی پەرلەمان، رەخنەی توند لە دەسەڵات دەگرێت و رایدەگەیەنێت، ئەو لایەنەی بەڵێنەکانی پڕۆسەکەی جێبەجێ نەکردووە و لە رێگەی دیموکراسی لایداوە، بەرەی دەسەڵاتە.
ئۆزگور ئۆزەل، سەرۆکی گشتیی پارتی نوێی تورکیا (یەنی پارتی)، دوای کۆبوونەوەی لەگەڵ ئومیت ئۆزداغ، سەرۆکی گشتیی پارتی زەفەر، لە کۆنگرەیەکی رۆژنامەوانیدا وەڵامی توندی مشتومڕەکانی پەیوەست بە کۆمسیۆنی چاودێریی پەرلەمان و بانگەوازەکەی دەم پارتیی بۆ "پێداچوونەوە بە بڕیارەکەیان" دایەوە.
ئۆزەل پێداگریی لەسەر بڕیاری بەشدارینەکردنیان لە کۆمسیۆنەکەدا کردەوە و رایگەیاند، دەسەڵات بەڵێنەکانی خۆی لەبارەی بەدیموکراسیکردنەوە جێبەجێ نەکردووە و گوتی، "ئێمە لە رێگەی ئاشتی پاشگەز نەبووینەتەوە، بەڵکوو ئەوان لە رێگەی دیموکراسی پاشگەز بوونەتەوە، بۆیە با کەس ئێمە بانگهێشتی لای ئەردۆغان نەکات، با بچێت ئەردۆغان بۆ دیموکراسی بانگهێشت بکات".
سەرۆکی گشتیی پارتی نوێ، لە هەڵسەنگاندنیدا بۆ بانگەوازەکەی دەم پارتی جەختی کردەوە، ئەو لایەنەی بە راستەقینە لە بەڵێنەکانی پاشگەز بووەتەوە بەرەی دەسەڵاتە و گوتی، "ئەوەی لە رێگە لایداوە، بەڵێنەکەی نەبردووەتە سەر و نکۆڵی لە واژۆکەی دەکات، ئاکپارتی، رەجەب تەیب ئەردۆغان و هاوپەیمانیی کۆمارین. هەرچەندە بەڕێز باخچەلی جاروبار وەبیرهێنانەوەی بچووکی وەک یەک دوو رستە لەبارەی بەدیموکراسیکردنەوە بە نموونەی 'ئەحمەدەکان بۆ سەر کار' دەکات، بەڵام لە کۆتاییدا ئەو خاڵەی پێی گەیشتووین روونە و ئاشکرایە. من لە ناخی دڵەوە بڕوام بە ژیری و دووربینیی گەلەکەمان هەیە".
پێشتر و لە رۆژی 20ی تشرینی دووەمدا، تونجەر باکرهان، هاوسەرۆکی دەم پارتی، لە وتارێکیدا لە چوارچێوەی بەرنامەی "بودجە بۆ کار، ئاشتی و دادپەروەری" لە شاری مێرسین، رەخنەی لە بڕیاری ئۆزگور ئۆزەل بۆ بەشدارینەکردن لە کۆمیسیۆنی ئاشتی و راگرتنی پشتیوانیکردنی بۆ پڕۆسەی نوێی ئاشتی، گرت.
باکرهان ئاماژەی بەوە دا، بەشدارینەکردن لە پڕۆسەکەدا دیموکراسی ناهێنێتە دی و گوتی، "کەس نەڵێت ئێمە بانگهێشتی لای کەسێکی دیکەتان دەکەین، ئێمە لە پاڵ ئاشتیداین و پارتی نوێش بانگهێشتی پاڵ ئاشتی دەکەین، بە بەشدارینەکردن لە پڕۆسەی ئاشتیدا دیموکراسی نایەتە دی".
رۆژی 18ی تشرینی دووەمی 2026، دوای کۆبوونەوەیەکی 40 خولەکی لەگەڵ نوعمان کورتوڵموش، سەرۆکی پەرلەمانی تورکیا، ئۆزگور ئۆزەل، سەرۆکی گشتیی پارتی نوێ، رایگەیاند، پارتەکەی نابێتە ئەندامی کۆمسیۆنی چاودێریی پەرلەمان و هۆکارەکەشی بۆ جێبەجێنەکردنی حەوتەمین بەندی راپۆرتی پەرلەمان لەبارەی بەدیموکراسیکردن، بەردەوامیی دانانی سەرپەرشتیاری حکوومی بەسەر شارەوانییەکان و سێ کەناڵی تەلەڤزیۆنیدا، هەروەها جێبەجێنەکردنی بڕیارەکانی دادگای دەستووری و دادگای مافی مرۆڤی ئەورووپا گەڕاندەوە.
رۆژی 19ی تشرینی دووەمی 2026، ئایشەگوڵ دۆغان، گوتەبێژی دەم پارتی، رەخنەی لە بڕیارەکەی پارتی نوێ گرت و ئاماژەی بەوە دا، دوورکەوتنەوەی بەرەی ئۆپۆزسیۆن مەترسیی لاوازکردنی زەمینەی دیموکراسیی پڕۆسەکە دروست دەکات و داواشی کرد، سەرۆکی پەرلەمان لەبری لێدوانی ناڕوون، خشتەیەکی کاتیی روون بۆ دامەزراندنی کۆمسیۆنەکە رابگەیەنێت.