مەسرور بارزانی، سەرۆکی حکوومەتی هەرێمی کوردستان، لە کۆتایی بەشدارییەکانی لە کۆڕبەندی ئابووریی جیهانی لە داڤۆس، جەختی لە بەهێزیی پێگەی هەرێمی کوردستان و پەیامی ئاشتیخوازانەی حکوومەتەکەی کردەوە و ڕایگەیاند: ئەمساڵیش بە هاوئاهەنگی و هاوبەشیی بەهێزترەوە کۆڕبەندەکە جێ دەهێڵن.

سەرۆکی حکوومەتی هەرێمی کوردستان ئاماژەی بەوە کرد، پەیامی نەگۆڕی ئەوان بۆ جیهان ڕوونە و خۆی لە چەند بنەمایەکی سەرەکیدا دەبینێتەوە، کە بریتین لە بژاردەی گفتوگۆ لەبری شەڕ و ناکۆکی، و چەسپاندنی ماف لەبری پشتگوێخستن، هەروەها برەودان بە وەبەرهێنان لەبری نادڵنیایی.

ئەمساڵیش کۆڕبەندی ئابووریی جیهان لە داڤۆس بە هاوئاهەنگیی و هاوبەشی بەهێزترەوە جێ دەهێڵین و پەیامی نەگۆڕمان بریتییە لە: گفتوگۆ لەبری شەڕ و ناکۆکی، ماف لەبری پشتگوێخستن، وەبەرهێنان لەبری نادڵنیایی. #KurdistanInDavos #WEF26

— Masrour Barzani (@masrourbarzani) January 22, 2026

مەسرور بارزانی ڕایگەیاند: کە ئەمە سێیەم ساڵە "ماڵی کوردستان" لە داڤۆس دەکەنەوە و ئەمجارە زیاتر لە 20 بازرگان و وەبەرهێنەری کوردستان بەشدار بوون و دیداریان لەگەڵ کۆمپانیا جیهانییەکان هەبووە.

گوتیشی: "ئامانجمان ئەوەیە پەیوەندییە بازرگانییەکان لەگەڵ وڵاتانی جیهان و کۆمپانیاکان باشتر بکەین و دەرگای زیاتر بۆ وەبەرهێنان لە هەرێمی کوردستان بکەینەوە. بازرگانانمان ئارەزووی کارکردن لە هەر کەرتێکدا بکەن، ئێمە وەک حکوومەت پاڵپشتییان دەکەین."

لە وەڵامی پرسیارێکدا دەربارەی دۆخی ناوخۆ و پێکهێنانی کابینەی دەیەمی حکوومەتی هەرێم، مەسرور بارزانی هەڵوێستی ڕوونی پارتی دیموکراتی کوردستانی دووپات کردەوە.

سەرۆکی حکوومەتی هەرێمی کوردستان ڕایگەیاند: "پارتی هەر لە یەکەم ڕۆژەوە ئامادە بووە بۆ پێکهێنانی حکوومەت، بەڵام لەسەر بنەمای ڕێزگرتن لە ئەنجامی هەڵبژاردن. پارتی لەسەر ڕای خۆی بەردەوامە و پێمان وایە دەبێت ڕێز لە ڕای خەڵکی کوردستان بگیرێت."

ئەمڕۆ پێنجشەممە 22ـی کانوونی دووەمی 2026، مەسرور بارزانی، سەرۆکی حکوومەتی هەرێمی کوردستان، لە چوارچێوەی بەشداریکردنی لە کۆڕبەندی ئابووریی جیهانی لە داڤۆس، لەگەڵ خەلیفە عەبدوڵلا عەجیل، وەزیری بازرگانی و پیشەسازیی دەوڵەتی کوەیت کۆبووەوە.

هەردوولا جەختیان لە پەرەپێدانی پەیوەندیی دوولایەنە لە بوارەکانی وەبەرهێنان و ئاڵوگۆڕی بازرگانی کردەوە.

سەرۆکوەزیران، مەسرور بارزانی لە کۆنفرانسە ڕۆژنامەوانییەکەی داڤۆس گوتی: ئەمڕۆ کۆبوونەوەیەک لە هەولێر لە نیوان مەزڵووم عەبدی و تۆم بەڕاک کراوە، ئەوەی من زانیوومە، هەردوولا گەیشتوونەتە ئەوەی ئاگربەست لە ڕۆژئاوا بەردەوام بێت، دەرفەتێک بدرێت بۆ ئەوەی بگەن بە لێک تێگەیشتنێکی دوولایەنە تا ئاشتی و سەقامگیری بەرقەرار بێت.

گوتیشی: هیوادارم شەڕ دووبارە بەرپا نەبێتەوە.

مەسرور بارزانی سەرۆکی حکوومەتی هەرێمی کوردستان ڕایگەیاند: لەگەڵ هەر کەسایەتییەک دیدار و کۆبوونەوومان هەبووە، جەختیان کردووەتەوە، کە دەبێت بە خێرایی کۆتایی بە شەڕ بێت و هیچ کەسێک لەگەڵ شەڕ و ئاڵۆزی نەبووە.

رایگەیاند، ئەوەی ئێستا گرنگە، دەبێت ئاگربەست بەردەوام بێت بۆ ئەوەی ئەو فشارە دەروونییە لەسەر خەڵکی کوردستان نەمێنێت.

شازادەی جێنشینی ئوردن، سڵاو و ڕێزی شا عەبدوڵڵای دووەمی بە سەرۆکی حکومەت گەیاند و هەموو ئامادەییەکی وڵاتەکەی بۆ پشتیوانیی هەرێمی کوردستان نیشان دا.

لە کۆبوونەوەکەدا جەخت لە بەرەوپێشبردنی زیاتری پەیوەندیی دۆستانە و تایبەتی نێوان هەرێمی کوردستان و شانشینی ئوردن کرا.

مەسرور بارزانی سەرۆکی حکوومەتی هەرێمی کوردستان گوتی: هەر چەندە ئێمە بۆ بابەتی ئابووری هاتووینەتە داڤۆس، بەڵام دۆخی ڕۆژئاوا و هەوڵی ڕاگرتنی شەڕ لە رۆژئاوای کوردستان و ناوچەکە بووە، بە بابەتی سەرەکی گفوتوگۆ و دیدارەکانمان لە سەرۆک و سەرکردەکانی جیهان.

گوتیشی: توانیمان لە کۆبوونەوەکاندا لەگەڵ سەرکردە و نوێنەرانی وڵاتاندا، ئەم دۆخەی لە ڕۆژئاوای کوردستان هەیە، بیخەینە ڕوو، هەوڵی جیددیمان داوە بۆ ئەوەی ئاشتی بەرقەرار بێت و شەڕ بە کۆتایی بێت.

سەرۆکوەزیران گوتی: هیوادارم ئەو ترسە لە ناو خەڵک نەمێنێت و ئاشتی بەرقەرار بێت.

سەرۆکوەزیران، مەسرور بارزانی گوتی: جیا لە بابەتی ئابووری، لە تەوەرێکی دیکەی کۆبوونەوەکانماندا باسمان لە دۆخی ڕۆژئاوای کوردستان کرد، سەرنجمان لەسەر ئەوە بوو پشتیوانی نێودەوڵەتی کۆ بکەینەوە بۆ ئەوەی کۆتایی بە شەڕ و پێکدادان بێت و ئەو هێرشە ناڕەوایەی دەکرێتە سەر هاووڵاتیانی کورد لە ڕۆژاوای کوردستان ڕابگیرێت.

گوتیشی: لەگەڵ سەرکردەکانی جیهان ئەو بابەتەمان بە جیددی باسکرد و هیوادارم ئەنجامی هەبێت و سەقامگیریی لە ناوچەکە بەرپا بێت.

مەسرور بارزانی، سەرۆکی حکوومەتی هەرێمی کوردستان، لە داڤۆس، کۆنفرانسێکی ڕۆژنامەوانیدا گوتی: لە کۆڕبەندی ئابووریی جیهانی چەندین تەوەر هەبوون، قسەی لەسەر بکەین، یەکەمیان باشترکردنی پەیوەندییە بازرگانییەکانە لەگەڵ وڵاتان و کۆمپانیاکانی جیهان، بۆ ئەوەی دەرگای زیاتر بۆ وەبەرهێنان لە هەرێمی کوردستان بکەینەوە.