تاران پێشنیازێکی نوێی ئاڕاستەی نێوەندگیرەکان کردووە کە تێیدا ئامادەیی خۆی نیشانداوە بۆ کردنەوەی گەرووی هورمز بە رووی هاتوچۆی نێودەوڵەتیدا، ئەمەش لە بەرانبەر راگرتنی یەکجاریی جەنگ و هەڵگرتنی گەمارۆ دەریاییەکانی ئەمریکا. ئەم پلانە سێ قۆناغییەی ئێران داوا دەکات گفتوگۆکان لەسەر بەرنامە ئەتۆمییەکەی بۆ کاتێکی تر دوابخرێت.

وەزارەتی دەرەوەی ئەمریکا لە رێگەی پڕۆگرامی "پاداشت بۆ دادپەروەری" (Rewards for Justice)، بڕی 10 ملیۆن دۆلاری وەک خەڵات تەرخان کرد بۆ هەر کەسێک زانیاریی ورد لەسەر شوێن یان چالاکییەکانی "حەیدەر مەزهر مەلەک سەعیدی" بدات. ناوبراو کە سەرکردەی گرووپێکی چەکداری نزیک لە ئێرانە، بە کوشتنی سەربازانی ئەمریکی و هاووڵاتییانی مەدەنی تۆمەتبار دەکرێت.

عەباس عێراقچی، وەزیری دەرەوەی ئێران رایگەیاند، سەردانەکەی بۆ رووسیا دەرفەتێکی باش بووە بۆ هەماهەنگی لەگەڵ مۆسکۆ سەبارەت بە پێشهاتەکانی قۆناخی داهاتوو، ئەمەش لە سایەی بەردەوامیی گرژی و جەنگ لەگەڵ ئیسرائیل و ئەمریکا.

کەناڵی "پرێس تی ڤی"ـی ئێرانی بڵاویکردووەتەوە، یەکەکانی سەر بە سوپای پاسداران ژمارەیەک مووشەکی نەتەقیو و هەزاران بۆمبی بچووکی ئەمریکییان لە سنووری پارێزگای "هورمزگان"ـی باشووری وڵاتەکە دۆزیوەتەوە. 

فەرماندەیەکی سەربازیی فەیلەقی "ئیمام سەجاد" کە بۆ کەناڵەکە قسەی کردووە، ئاماژەی بەوە داوە، زیاتر لە 15 مووشەکی "قورس"ـی ئەمریکییان دۆزیوەتەوە و رادەستی یەکەکانی تەکنیکی و لێکۆڵینەوە کراون بە مەبەستی ئەنجامدانی "ئەندازیاری پێچەوانە" لەسەریان. 

لێرەدا مەبەست لە "ئەندازیاری پێچەوانە" شیکردنەوەی و پشکنینی مووشەکەکەیە بە مەبەستی دەستخستنی زانیاری لەبارەی توانا، ئەرک و وردەکارییەکانی دیکەی. 

هاوکات فەرماندەیەکی دیکەی فەیلەقی "ئەنسار مەهدی" کە بارەگاکەی دەکەوێتە پارێزگای زنجانی باکووری رۆژهەڵاتی ئێران؛ باسی لەوە کردووە، زیاتر لە 9500 بۆمبی بچووکی ئەمریکییان لە دەوروبەری پارێزگاکە کۆکردووەتەوە. 

کەناڵەکە روونیشی کردووەتەوە، هێزە ئەمنییەکان توانیویانە بۆمبێکی جۆری "جی بی یو – 57"ـی تێکشکێنەری سەنگەرە قایمکراوەکان پووچەڵ بکەنەوە و رادەستی لایەنە پەیوەندیدارەکانیان کردووە. 

کۆمپانیای "تانکەر تراکەرز" تایبەت بە چاودێریکردنی کەشتییە نەوتهەڵگرەکان ئاشکرای کرد، ئێران لە بەندەرەکانیدا چوار ملیۆن و 600 هەزار بەرمیل نەوتی خاوی بار کردووە.

کۆمپانیاکە ئاماژەی بەوە دا، چوار ملیۆن بەرمیل نەوتی ئێران گەمارۆ دەریاییەکەی ئەمریکای تێپەڕاندووە و گەیشتووەتە دەرەوە.

لەلایەکی ترەوە کۆمپانیاکە روونیشی کردەوە، هێزی دەریایی ئەمریکا دەستی بەسەر نەوتی ئێراندا گرتووە بە بەهای 380 ملیۆن دۆلار و دەیگوازنەوە بۆ ناوخۆی وڵاتەکەیان. 

هەروەها، بە بەهای زیاتر لە یەک ملیار دۆلار نەوتی ئێرانیشیان گەڕاندووەتەوە و رێگرییان لێ کردووە گەمارۆ دەریاییەکەیان تێپەڕێنێت.

باڵیۆزی ئێران لە پاکستان، لە پەیامێکدا جەختی لە رۆڵی گرنگی هەوڵەکانی ئیسلام ئابادبۆ هێنانەکایەی ئاشتی و راگرتنی جەنگ لە رۆژهەڵاتی ناوەڕاستدا کردەوە.

وەزیری دەرەوەی پاکستان، جەختی لە بەردەوامیی پابەندبوونی ئیسلام ئاباد بە هەوڵە دیپلۆماسییەکان بۆ دەستەبەرکردنی ئاشتی و سەقامگیری لە ناوچەکەدا کردەوە.

سەرۆکی ئەمریکا ئاشکرای کرد، بەشێک لەو کەسانەی ئێستا لە پرسی ئێراندا مامەڵەیان لەگەڵ دەکەین زۆر عەقڵانی و تێگەیشتوون، بەڵام هەندێکی دیکەیان بەو شێوە نینە.

وەزیری دەرەوەی ئێران بە مەبەستی درێژەدان بە هەوڵە دیپلۆماسییەکان بۆ کۆتاییهێنان بە جەنگ گەڕایەوە پاکستان، لە کاتێکدا سەرۆکی ئەمریکا پێداگری لەسەر "سەرکەوتن" دەکات و سەردانی نێردەکانی بۆ ئیسلام ئاباد هەڵوەشاندەوە. 

ئاژانسی هەواڵەکانی عوممان بڵاویکردووەتەوە، ئەمڕۆ یەکشەممە، 26ـی نیسانی 2026، هەیسەم بن تاريق، سوڵتانی عوممان لە کۆشکی "بەرەکە" پێشوازی لە عەباس عێراقچی، وەزیری دەرەوەی ئێران کرد. 

بە گوێرەی هەمان سەرچاوە، "لە دیدارەکەدا راوێژ لەبارەی دوایین پێشهاتەکانی ناوچەکە و هەوڵەکانی نێوەندگیری بۆ کۆتاییهێنان بە ململانێکان کرا. هەیسەم بن تاريق گوێی لە بۆچوونەکانی لایەنی ئێرانی گرت لەبارەی ئەو پێشهاتانە، هاوکات عەباس عێراقچی گوێبیسی تێڕوانینەکانی سوڵتان بوو بۆ پاڵپشتیکردنی ئەو هەوڵانە بە مەبەستی گەیشتن بە چارەسەری سیاسیی بەردەوام".

ئاژانسەکە هیچ وێنە و ڤیدیۆیەکی کۆبوونەوەکەی بڵاونەکردووەتەوە. 

سوڵتانی عوممان ئاماژەی بەوە دا، گرنگە زمانی گفتوگۆ و دیپلۆماسیەت لە چارەسەرکردنی پرسەکاندا زاڵ بێت بۆ چەسپاندنی ئاشتی لە ناوچەکەدا.

لای خۆیەوە عەباس عێراقچی رایگەیاند، وڵاتەکەی پێزانینی هەیە بۆ هەڵوێستەکانی مەسقەت لە پاڵپشتیکردنی گفتوگۆ و هەوڵەکانی ئاسایش و سەقامگیری لە رۆژهەڵاتی ناوەڕاست، بەتایبەتی لە سایەی ئاڵەنگارییە هەرێمییەکانی ئێستا.

لە کۆبوونەوەکەدا بەدر بوسعیدی، وەزیری دەرەوەی عوممان و ئیسماعیل بەقایی، گوتەبێژی وەزارەتی دەرەوەی ئێران و چەند بەرپرسێکی دیکە ئامادە بوون.