Dosya rakirina parêzbendiya HDPyiyan li Parlamento ye

K24 – Enqere

Dosyeya derbarê rakirina parêzbendiya yasayî ya 21 parlamenterên Partiya Demokratîk a Gelan (HDP) de ji Serokatiya Parlamentoya Tirkiyê re hat şandin. Heger parlamento daxwaza rakirina parêzbendiya yasayî ya parlamenteran qebûl bike wê rêya girtina wan jî bê vekirin.

Piştî ku Serokomarê Tirkiyê Recep Tayyîp Erdogan bang li parlamentoyê kir da ku parêzbendiya yasayî ya parlamenterên HDPê rake, Serokwezaretiyê dosyeya parêzbendiya yasayî ya 21 parlamenterên HDPê pêşkeşî Komîsyona Têkel a Dadê ya Serokatiya Parlamentoyê kir.

Di nav wan de dosyeyên hevserokên HPDê Selahattîn Demîrtaş û Fîgen Yuksekdag, parlamentera Stenbolê Pervîn Buldan, parlamenterên Diyarbekirê Altan Tan, Nursel Aydogan û Îmam Taşçier, parlamenterên Wanê Tugba Hezer Ozturk, Lezgîn Botan, Nadir Yildirim û Adem Geverî, parlamenterên Şirnexê Ferhat Encu û Leyla Birlik jî hene.

Herwiha dosyeya rakirina parêzbendiya yasayî ya du parlamenterên CHPê jî pêşkeşê Komîsyona Têkel a Dadê ya Serokatiya Parlamentoyê hatiye kirin. Bi vî awayî wê parlamento bikare derbarê pêşniyarên rakirina parêzbendiya yasayî ya parlamenteran de biryar bide.