HSDê dest bi operasyona bajarê Reqayê kir

K24 – Navenda Nûçeyan

Hêzên Sûriyeya Demokratîk (HSD) dest bi operasyona mezin a kontrolkirina bajarê Reqayê kir.

Berdevkê Fermî yê HSDê Eqîd Telal Silo di konfernaseke rojnamevanî de destpêkirina operasyona bajarê Reqayê ji 3 aliyan ve (Bakur, rojhilat û rojava) bi piştevaniya Hevpeymaniya Navdewletî ve ragihand.

Silo got: “Piştî bidawîbûna operasyonên kontrolkirina derdora Reqayê, ku bi serkeftî bidawî bûn, em wek HSDê destpêkirina operasyona mezin a kontrolkirina navenda bajarê Reqayê dest pê dikin.”

Silo amaje bi wê yekê kir, di çarçova 4 qonaxên kontrolkirina derdora Reqayê de, HSDê karî bi dehan hezar sivîl rizgar bikin û ji bo deverên HSDê veguhasin û li gor karînên wan jî pêwîstiyên jiyanê dabîn bikin.

Berdevkê HSDê navên hêzên di operasyona mezin de aşkere kirin ku, YPG, YPJ, Ceyş El-Swar, Cebhet El-Ekrad, Lîwa El-Şîmalî El-Demokratî, Hêzên Eşîretan, Lîwa Mexawîr Humis, Siqor El-Reqa, Lîwa Tehrîr, Lîwa Selaciqa, Hêzên Senadîd, Encûmena Leşkerî ya Siryanî, Encûmena Leşkerî ya Minbicê û Encûmena Leşkerî ya Dêrezorê ne û bi beşdariya Hêzên El-Nuxbe, hêzên erkê xweparstinê û hêzên asayişê.

Ji aliyê xwe ve, endamê Encûmena Sivîl a Reqayê Fîras Memdoh El-Fehed  jî ragihand, ku piştî rizgarkirina Reqayê, ew ê bajarê Reqayê birêve bibin.