Wezareta Pêşmerge bi tundî bersiva Ebadî dide
Hikmet zelal kir: “Heger Ebadî hêzên Pêşmerge wek beşekî ji sîstema berevaniya Iraqê dibîne, madem çima dixwaze ew navçe radestî hêzeke din bê kirin.”
K24 – Navenda Nûçeyan
Wezareta Pêşmerge rexneyên tund li daxuyaniyên serokwezîrê Iraqê Heyder Ebadî kir, ku di wan daxuyaniyan de gotibû: “Pêwîst e hêzên Pêşmerge di bin fermana fermandariya hêzên federal de bin.”
Peyvdarê wezareta Pêşmerge Helgurd Hikmet, ji medya Iraqî re axivî û rexneyên tund li Ebadî kir, ku di daxuyaniyên xwe de li Parîsa paytexta Firensa gotibû: “Pêwîst e navçeyên Kurdistanî yên derveyî îdara Herêma Kurdistanê, radestî hêzên Iraqî bên kirin û hêzên Pêşmerge bibin beşêk ji sîstema berevaniya Iraqê.”
Helgurd Hikmet tekez kir: “Heya niha ti alîkariyeke serbazî ji Iraqê negihiştiye hêzên Pêşmerge, di demekê de ew navçeyên daxwaz dikin, bi xwîna şehîdên Pêşmerge hatine kontrolkirin.”
Hikmet zelal kir: “Heger Ebadî hêzên Pêşmerge wek beşekî ji sîstema berevaniya Iraqê dibîne, naxwe çima dixwaze ew navçe radestî hêzeke din bê kirin.?”