Dezgeha Xêrxwaziya Barzanî li Efrînê xuleke din a zimanê Kurdî vekir
Efrîn (K24) – Li bajarê Efrînê, Dezgeha Xêrxwaziya Barzanî (BCF) bi rêya Navenda Barzanî ya Çand û Geşepêdanê, berdewam e li ser piştgirîkirina xelkê herêmê bi rêya vekirina xule û dewreyên curbicur, bi taybetî di warê hînkirina zimanê Kurdî de. Armanc ew e ku ciwan û xelkê deverê karibin zimanê xwe yê dayikê baştir fêr bibin û çanda xwe biparêzin.
Heyfa Bîlal, keçeke Kurd a ji bajarê Efrînê ye ku ligel hevala xwe Yara, piştî qedandina dersên xwe yên zanîngehê, berê xwe didin Navenda Barzanî. Armanca wan ew e ku beşdarî xula fêrbûna zimanê Kurdî bibin.
Heyfa ji K24 re got: “Ez ji bajarê Efrînê me. Ez li zanîngehê dixwînim û li kêleka xwendina xwe, min xwest ez werim zimanê xwe fêr bibim.” Wê herwiha spasiya Dezgeha Xêrxwazî ya Barzanî kir ji ber hewildanên wan ên girîng ji bo xizmetkirina herêma Efrînê û hêviya xwe anî ziman ku rojekê ew ê bigihîjin dereceyên bilindtir.
Yara jî ku ew jî xwendekareke zanîngehê ye, behsa girîngiya fêrbûna zimanê Kurdî kir û got ku ew bi rêya vê navendê, fersendê dibînin ku zimanê xwe baştir bikin û pêş bixin.
Navenda Barzanî ya Çand û Geşepêdanê ev çend sal in ku li bajarê Efrînê deriyên xwe ji xelkê re vekiriye. Ji wê demê ve, bi berdewamî xulên fêrbûna zimanê Kurdî di astên cuda de tên lidarxistin. Heta niha zêdetirî 150 xwendekarî ji van xulan sûd wergirtine û karîne şarezayiyên xwe yên di warê xwendin, nivîsandin û axaftina bi zimanê Kurdî de xurt bikin.
Şêrîn Ebdo, mamosteya zimanê Kurdî li Navenda Barzanî, diyar kir ku ew xulên zimanê Kurdî di sê astan de (yekem, duyem û sêyem) pêşkêş dikin. Nêzîkî 40 xwendekar niha li navendê ji bo fêrbûna zimanê Kurdî amade dibin.
Şêrîn Ebdo got: “Piranî xwendekarên zanîngehê ne û dixwazin li gel xwendina xwe ya zanîngehê, zimanê Kurdî jî fêr bibin. Ev gaveke pîroz e û em hêvî dikin hemû ciwan û xwendekarên zanîngehê fêrî zimanê Kurdî bibin, ji ber ku mirov çiqas payebilind bibe jî, divê bi zimanê xwe be. Ziman nasnameya me ye.”
Ji bilî xulên zimanê Kurdî, navend xulên din ên wekî fêrbûna zimanê Îngilîzî, wênesazî û muzîkê jî pêşkêşî xelkê herêmê dike. Ev yek jî derfetekê dide ciwanan ku şarezayiyên xwe di warên cuda de pêş bixin û behreyên xwe nîşan bidin.
Dezgeha Xêrxwazî ya Barzanî bi van çalakiyên xwe yên li Efrînê, ne tenê alîkariyê dide parastin û geşepêdana ziman û çanda Kurdî, lê di heman demê de piştgiriyê dide ciwanan ku xwe di warên cuda de perwerde bikin û ji bo paşerojeke baştir amade bibin.
