Artêşa Îsraîlê hejmara leşkerên xwe yên ku hatine kuştin aşkere dike

Navenda Nûçeyan (K24) – Artêşa Îsraîlê ragihand, leşkerekî din ê Îsraîlî li başûrê Kerta Xezzeyê hatiye kuştin. Bi vê yekê re, hejmara giştî ya leşkerên Îsraîlî yên ku ji 7ê Cotmeha 2023yan ve di şer de hatine kuştin, gihîşt 900 kesan.

Li gorî daxuyaniya artêşa Îsraîlê, efserê bi navê Ariel Lublin ê 34 salî, ku di Lîwaya Lojîstîkî ya 2036an a ser bi Firqeya 36an ve kar dikir, di şerekî li başûrê Kerta Xezzeyê de jiyana xwe ji dest da. Kuştina vî efserî rojek piştî kuştin û birîndarbûna hejmarek leşkerên din ên Îsraîlî li Kerta Xezzeyê pêk hat. 

Amarên Kuştiyên Artêşa Îsraîlê

Malpera fermî û Radyoya Artêşa Îsraîlê hejmara 900 leşkerên kuştî piştrast kirin û amarên berfireh bi vî awayî belav kirin:

- 329 leşker: Di roja 7ê Cotmehê de hatin kuştin.

- 456 leşker: Di operasyonên bejayî yên li Kerta Xezzeyê de hatin kuştin.

- 50 leşker: Di êrîşa li ser Libnanê de hatin kuştin.

- 34 leşker: Di êrîşên li dijî Hizbullaha Libnanê de hatin kuştin.

- 16 leşker: Di pevçûnên li KenaraRojava de hatin kuştin.

- 2 leşker: Di êrîşên bi dronan ên mîlîsên Iraqî de hatin kuştin.

- 1 leşker: Di encama êrîşên mûşekî yên Îranê de hate kuştin.

- 12 leşker: Di bûyer û operasyonên din ên cuda de hatin kuştin.

Bîlançoya giran a li aliyê Filistînê

Ji 7ê Cotmeha 2023yan ve, di encama êrîşên hêzên Îsraîlê de, nêzîkî 63 hezar Filistînî hatine kuştin û nêzîkî 159 hezar kes jî birîndar bûne. Hat ragihandin ku piraniya qurbaniyan zarok û jin in. Herwiha, zêdetirî 10 hezar kes winda ne û bi sed hezaran kes jî koçber bûne.

Li gorî daneyên Wezareta Tenduristiyê ya Xezzeyê, ji ber birçîbûn û kêmasiya xwarinê li Zîvala Xezeyê, 322 Filistîniyan canê xwe ji dest dane, ku ji wan 121 kes zarok in.