Li Qamişloyê çêkirina tirşî bo hejmareke jinan bûye çavkaniyeke dahatê

Navenda Nûçeyan (K24) - Hejmareke jinên pîr li Rojavayê Kurdistanê û xasma li Qamişloyê di destpêka demsala havînê de gelek cûnên tirşî çê dikin û hildigirin. Ji bilî dabînkirina tirşî ji bo zivistanê, ev kar ji bo van malbatan bûye çavkaniyeke girîng a dahatê jî, xasma ji ber rewşa aborî ya dijwar a deverê.

Pêvajoya çêkirina tirşî di meha Gulanê û dawiya Hezîranê de dest pê dike, dema ku pêkhateyên sereke yên wekî filfil, xiyar, fasoliyên kesk û yên din tên komkirin. Piştî tevlihevkirina wan pêkhateyan, tama tirşî û rengê taybet lê tên zêdekirin, ku ev jî pareke taybetmendiyên berhemên xwemalî ye.

Dayika Îbrahîm yek ji wan jinan e yên ku mijûlî vî karî ne û got, "Ev kom li mehên Gulan û Hezîranê ji bo tirşiyên me dest bi komkirina pêkhateyan dike, wekî bîber, xiyar, fasûlyeyên kesk û yên din." Wê amaje jî da ku, xelk jê razî ye û ev kar ji bo malbat û zarokên wan dahatekê peyda dike.

Jineke din jî bi navê Dayika Hisên got, "Mixabin, ez neçar im ku vî karî bikim ji ber ku debara min xirab e û du nexweşên min li malê hene." Amaje jî da, "Rewşa aborî bi gelemperî li vê derê xirab e." Ev karê destî ji hêla aborî ve ji bo malbatan bûye cûneke piştevaniyê.

Wekî ku ew jin dibêjin, hemî cûnên tirşî li gorî daxwaziyên xelkî tên çêkirin; "Daxwaza xelkî li ser berhemên wan zêde ye ji ber ku ew paqij û bijîn in û hemî pêkhateyên wan xwemalî ne. Welatiyan bawerî bi van berhemên xwemalî heye û di zivistanê de wan dixwen ji ber ku ew ji tevlihevkirina madeyên xeter di berhemên sûkê de ditirsin."