Xwepêşandanên Qamişlo di roja sêyem de ne: "Na ji gendelî û birçîkirinê re"

Navenda Nûçeyan (K24) – Li bajarê Qamişlo, xwepêşandanên nerazîbûnê yên li dijî buhabûna bihayê sotemeniyê û xirabûna rewşa jiyanê di roja sêyem de berdewam dikin. 

Îro 23ê Hezîranê jî bi dehan welatiyên Qamişloyê daketin qadan û nerazîbûna xwe li dijî bilindbûna nirxan, qutbûna elektrîkê û kêmbûna xizmetguzariyên bingehîn nîşan dan. 

Xwepêşandêran bi hildana pankartan û berzkirina dirûşmên wek "na ji gendeliyê re!", "na ji birçîkirina gel re!", "belê ji dabeşkirina dadperwer a samanan re!" û "na ji buhabûna nirxan re!", daxwaza çaksaziyên aborî û dadperweriyê kirin.

Li aliyê din, krîza sotemeniyê bandoreke giran li sektora veguhastinê kiriye. Xwediyên teksî û wesayitên veguhestina giştî, li ber navenda sereke ya sotemeniyê ya bajarê Qamişlo kom bûn û ketin grevê.

Ajokaran diyar kirin, bihayê nû yê sotemeniyê li ser karê wan bûye barekî giran û daxwaz kirin ku biryara zêdekirina bihayê mazotê were hilweşandin.