Ji bo paşeroja keşûhewayê: Serkirdeyên cîhanê li Tirkiyeyê dicivin
Navenda Nûçeyan (K24) – Di çarçoveya 31emîn Konferansa Neteweyên Yekgirtî ya li ser Guherîna Keşûhewayê (COP31) de, Lûtkeya Rêberên Cîhanê li bajarê Antalyayê yê Tirkiyeyê bi beşdariya zêdetirî 100 serok û serkirdeyên navdewletî dest pê kir. Şandeke payebilind a Hikûmeta Herêma Kurdistanê jî ji bo pêşkêşkirina metirsiyên jîngehî yên herêmê di lûtkeyê de cih digire.
Lûtkeya rêberan ku di bin çavdêriya Serokkomarê Tirkiyeyê Recep Tayyip Erdogan de birêve diçe, wek girîngtirîn û hestiyatirîn qonaxa konferansê tê dîtin û dê du rojan dewam bike. Di vê lûtkeyê de biryarderên sereke yên cîhanê dicivin da ku li ser kêmkirina bandorên guherîna avhewayê bigihîjin biryar û rêkeftinên çarenûssaz.
Li gorî agahiyan, di lûtkeya rêberan de 102 serok û serokdewletên cîhanê li gel nûnerên 196 welatan û Yekîtiya Ewropayê amade ne. Her wiha zêdetirî 300 wezîr, hejmareke berbiçav ji berpirsên bilind ên Neteweyên Yekgirtî, Banka Cîhanî û Ajansa Navdewletî ya Wizeyê beşdar dibin.
Di vê çarçoveyê de, şandeke payebilind a Hikûmeta Herêma Kurdistanê jî amade ye da ku dîtin, pêşniyar û pirsgirêkên girêdayî gefên jîngehî û qeyrana avê ya li herêmê raberî civaka navdewletî bike.
Rojeva sereke ya civînê
Di civînên van her du rojan de, serkirdeyên cîhanê dê giranî bidin ser çend mijarên stratejîk; di serî de:
- Lezkirina proseya veguhastina ber bi wizeya paqij ve.
- Cîbicîkirina projeya "Bermahiyên Sifir".
Misogerkirina ewlehiya xurekê û avakirina bajarên li hember guherîna keşûhewayê xweragir.
- Pêşxistina pîşesaziya kesk, parastina jîngeha derya û deryayan, û her wiha bihêzkirina sektora tenduristiyê li hember metirsiyên jîngehî.
Ev cara yekem e ku Tirkiye mêvandariya Konferansa Guherîna Keşûhewayê ya Neteweyên Yekgirtî dike. Tê çaverêkirin ku tevahiya kar û çalakiyên konferansa COP31ê bi giştî 12 rojan bidome.