Li Zanîngeha Dihokê pêşangeha "Îştar" hat vekirin

Navenda Nûçeyan (K24) – Pêşangeha hevbeş a hunerî ya bi navê "Îştar" ku taybet e bi xweragirî, têkoşîn û mîrata dîrokî ya jinên Kurd, îro li Kolêja Hunerên Ciwan a Zanîngeha Dihokê deriyên xwe vekir û dê du rojan dewam bike.

Yek ji serperiştiyarên pêşangehê, Hemrîn Îsa, îro 11ê Mijdara 2026an di daxuyaniyekê de ji Kurdistan24ê re ragihand: "Di vê pêşangeha hevbeş a hunerî ya bi navê 'Îştar' de, 12 hunermendên şêwekar bi 28 tabloyan beşdar in. Çalakî bi armanca rêzgirtina li jinan, têkoşîn û beşdariya wan a dîrokî di civaka Kurdewarî de tê lidarxistin."

Derbarê girîngiya pêşangehê de, Hemrîn Îsa destnîşan kir ku çalakî giranî daye ser berxwedan û rola berbiçav a jinên Kurdistanê û got: "Armanca me ew e ku em rêzê li tevkariya dîrokî ya jinan bigirin û wê rola wan derxin pêş ya ku di sazkirina pêkhateya civakî, parastina nasnameya çandî û dewlemendkirina kelepûra Kurdî de lîstine. Hunermendên beşdar bi riya tabloyên xwe peyamên bihêz û dîtinên xwe yên hunerî pêşkêşî xelkê dikin."

Li ser sedema hilbijartina navê 'Îştar', serperiştiyara pêşangehê eşkere kir: "Di pêşangehê de navê 'Îştar' amajeyek e bo xwedawenda kevnar a dîroka Mezopotamyayê ku di çîrok û efsaneyan de bi hêz, jiyan û hilberînê ve girêdayî ye; lewma me ev nav wek sembolek ji bo serbilindî û xweragiriya jinên Kurd destnîşan kir."

Ev çalakiya hunerî ji aliyê "Komeleya 213" û "Klûba Sînemaya Hunerî ya Ciwanan" ve, bi hevkariya Kolêja Hunerên Ciwan a Zanîngeha Dihokê hatiye organîzekirin.

Roja yekem a pêşangehê îro çarşemê ji saet 15:00 heta 18:00ê êvarê ye. Roja duyem jî, pêncşemê 12ê Mijdarê, ji saet 11:00ê sibehê heta 18:00ê êvarê deriyên pêşangehê li Kolêja Hunerên Ciwan li pêşberî hemû hezkiriyên hunerê vekirî dimînin.