قوباد تاڵەبانی: لە هیچ لایەنێک قبوڵ ناکرێت سەقامگیریی هەرێم بخاتە مەترسییەوە
''ئاسایشی هەرێمی کوردستان هێڵی سوورە''
K24- هەولێر:
قوباد تاڵەبانی، جێگری سەرۆکی حکومەتی هەرێمی کوردستان، راگەیەندراوێکی لەبارەی هێرشی مووشەکی سەر هەولێر بڵاوکردەوە.
قوباد تاڵەبانی رایگەیاندووە، بەداخەوە شەوی رابردوو هێرشکرایە سەر هەولێری پایتەخت و ژمارەیەک قوربانی لێ کەوتەوە.
لە راگەیەندراوەکە هاتووە، پاراستنی ئاسایش و سەقامگیری هەرێمی کوردستان هێڵی سوورە و لە هیچ کەس و لایەنێک قبوڵ ناکرێت بیخاتە مەترسییەوە.
قوباد تاڵەبانی دەڵێت، ئەم ھێرشەش زەنگێکی وریاکردنەوەیە بۆ هەموولامان، بۆ ئەوەی یەکڕیز و یەکدەنگ بین لە رووبەڕووبوونەوەی مەترسییەکان، هەروەها ئەم رووداوە و پێشینەکانی دەریانخست کە دەبێت حکومەتی فیدرال و حکومەتی هەرێم هەماهەنگی زیاتر بکەن بۆ نەهێشتنی بۆشایی ئەمنی لە ناوچە جێ ناکۆکەکان و پڕکردنەوەی درز و کەلێنەکان.
داواش دەکات، کۆمەڵگای نێودەوڵەتی و وڵاتانی هاوپەیمانیش پێویستە ئەم مەترسیانە بە جددی وەربگرن و یارمەتیدەرمان بن بۆ بنەبڕکردنی تیرۆر و سزادانی گروپە لە یاسا دەرچووەکان.