سەرۆك بارزانی و باڵیۆزی رووسیا گفتوگۆ لەبارەی سەقامگیریی ناوچەكە دەکەن
سەرۆك بارزانی پێشوازی لە باڵیۆزی رووسیا لە عێراق دەكات
K24 - هەولێر
رۆژی سێشەممە 6ـی تەمموزی 2021 لە سەلاحەددین سەرۆك مەسعود بارزانی پێشوازی لە ئیلبروس كوتراشیڤ باڵیۆزی تازەی رووسیا لە عێراق و شاندێكی یاوەری كرد.
لە دیدارەكەدا بیروڕا لەبارەی دوایین پێشهات و گۆڕانكارییە سیاسییەكان لەسەر ئاستی عێراق و سووریا و ناوچەكە و هەڕەشەكانی تیرۆر ئاڵوگۆڕ كرا و، پەیوەست بە شەڕی تیرۆرەوە، سەرۆك بارزانی جەختی لەوە كردەوە كە ڕیشەكێشكردنی تیرۆر هەوڵێكی هەمە لایەنەی نێودەوڵەتی گەرەكە و بە پێویستیشی زانی كە هەوڵەكان بۆ لەناوبردنی تیرۆر لە عێراق و سووریا هاوكات و هاوتەریبی یەكتر بێت.
هەر لەوە دیدارەدا تەحەددیاتی بەردەم پڕۆسەی سیاسیی عێراق و هەڵبژاردنەكانی داهاتووی عێراق خرایە بەر باس و گفتوگۆ و، جەخت لەسەر كاریگەریی بارودۆخی عێراق لەسەر سەقامگیریی ناوچەكە كرایەوە.
پەیوەندییەكانی نێوان هەرێمی كوردستان و رووسیا تەوەرێكی تری ئەو دیدارە بوو و سەرۆك بارزانی هیوای سەركەوتنی بۆ باڵیۆزی تازەی رووسیا لە عێراق خواست لە ئەرك و چالاكییەكانیدا.