گواستنەوەی نەوتی کەرکووک دەستپێدەکاتەوە

K24 - هەولێر:

شەوی رابردوو بۆری گواستنەوەی نەوتی کەرکووک – جەیهان، لە باکووری کوردستان تەقییەوە.

کۆمپانیای (بۆتاش) کە بەرپرسە گواستنەوەی نەوتی خاو بەخاکی تورکیا رایگەیاند، شەوی رابردوو لە 18ـی کانوونی دووەمی 2022 لە 511هەمین كیلۆمه‌تری بۆری گواستنه‌وه‌ی نه‌وتی خاوی عێراق-توركیا ته‌قینه‌وه‌یه‌ك به‌ هۆكارێك كه‌ تا ئێستا نه‌زانراوه‌ روویداوه‌ و به‌هۆیه‌وه‌ ئاگر كه‌وتووه‌ته‌وه‌. 

لە راگەیەندراوەکەدا هاتووە، "تیمه‌كانی بۆتاش ده‌ستبه‌جێ گواستنەوەی نه‌وتیان وه‌ستاندووه‌  و له‌چوارچێوه‌ی رێكاره‌كانی ئاسایشی ته‌كنیكیدا نزیكترین قفڵه‌كان له‌ ناوچه‌ی رووداوه‌كه‌ گیراونه‌ته‌وه‌".

ئاگری تەقینەوەکە بە هەماهەنگی نێوان شارەوانی مارەش، شارەوانی عەنتاب، بەڕێوەبەرایەتی ئاگرکوژێنەوەی دارستانی مارەش و ئاسایش کۆنترۆڵ کراوە و کوژاوەتەوە.

کۆمپانیای بۆتاش راشیگەیاند، پرۆسەی گواستنەوەی نەوت لە بیرە نەوتییەکان، یەک کاتژمێری دیکە دەست پێدەکاتەوە.

شەوی رابردوو، تەقینەوەی هێڵی بۆریە نەوتییەکان، بووەهۆی وەستانی هاتوچۆی نێوان هەردوو شاری مارەش و عەنتاب (دیلۆکە) کە دەکەونە باکووری کوردستان.