پێشمەرگە و هاوپەیمانان هەنگاوەکانی یەکخستنەوەی پێشمەرگە خێرا دەکەن
سەرۆکی ئەرکانی وەزارەتی پێشمەرگە و فەرماندەی هێزەکانی هاوپەیمانان لە هەرێمی کوردستان، پلانی چاکسازیی و هەنگاوەکانی یەکخستنەوەی هێزەکانی پێشمەرگە تاوتوێ دەکەن.
وەزارەتی پێسمەرگە بڵاوی کردەوە، فەریق ڕوکن عیسا عوزێر سەرۆکی ئەرکانی وەزارەتی پێشمەرگە لەگەڵ کۆڵۆنێڵ راپ براندستێتەر فەرماندەی هێزەکانی هاوپەیمانان لە هەرێمی کوردستان و شاندێکی یاوەری، لە بارەگای وەزارەتی پێشمەرگە کۆبووەوە.
بەپێی ڕاگەیاندراوی وەزارەتەکە، تەوەری سەرەکی کۆبوونەوەکە تایبەت بوو بە جێبەجێ کردنی بەرنامە و پلانی چاکسازیی لە وەزارەتی پێشمەرگە و ڕێکخستنەوەی تەواوی هێزەکان، هاوکات بارودۆخی هەنووکەیی هێزی پێشمەرگە و پەرەپێدانی پەیوەندی نێوان وەزارەتی پێشمەرگە و هاوپەیمانان گفتوگۆ کرا، ئاماژە بەوەش دەکات، هەردوولا هاوڕابوون لەسەر خێراکردنی هەنگاوەکان بە ئاڕاستەی یەکخستنەوەی یەکە جیاوازەکانی هێزەکانی پێشمەرگە بۆ سەر وەزارەتی پێشمەرگە و ڕێکخستنیان لە چوارچێوەی فیرقەی نوێ.
