دژە تیرۆری کوردستان: لە مەخموور درۆنێکی تورکیا بنکەیەکی پەکەکەی بۆمباران کرد

دژە تیرۆری کوردستان ڕایگەیاند، لە بۆمبارانی فڕۆکەی بێفڕۆکەوانی تورکیا بۆ سەر بنکەیەکی چەکدارانی پەکەکە لە مەخموور، کەسێک کوژراو و دوانی دیکەش بریندار بوون.

دژەتیرۆری کوردستان لە ڕاگەیەندراوێکدا ئەوەی خستە ڕوو، دووشەممە 16ی ئەیلوولی 2024، کاتژمێر 09:45 خولەکی پێشنیوەڕۆ، فڕۆکەی بێفڕۆکەوانی سوپای تورکیا بۆمبارانی بنکەیەکی کۆبوونەوەی ئەندامانی پەکەکەی لە کەمپی مەخموور کرد و لە ئەنجامدا کەسێک کوژراو و دوانی دیکەش بریندار بوون کە لە نێو کوژراو و بریندارەکاندا بەرپرسی پەکەکە هەیە.

بە گوێرەی زانیارییەکانی کوردستان24، سەرەتا ڕێگە بە پۆلیسی مەخموور نەدراوە بچنە نێو کەمپەکە تا شوێنی بۆمبارانەکەیان پاککردووەتەوە؛ دواتر ڕێگەیان داوە و گوتوویانە: بوتڵی گاز تەقیوەتەوە! بەڵام سەرچاوەیەکی پۆلیسی مەخموور بە کوردستان24ـی ڕاگەیاند، چەند پارچەیەکی مووشەک لە شوێنی تەقینەوەکە مابوون.

پێشتر، کاتژمێر 16:45 خولەکی ڕۆژی سێشەممە 10-09-2024، فڕۆکەیەکی بێفڕۆکەوان ماڵێکی کەمپی مەخمووری بۆمباران کرد و لە ئەنجامدا کەسێک گیانی سپارد و دوو کەسی دیکەش بریندار بوون.