سەرۆكی ئەمریكا باسی رۆڵی پێشمەرگە دەكات
عەبادی و ئۆباما كۆبوونەوە
K24 – هەولێر:
باراك ئۆباما سەرۆكی ئەمریكا و حەیدەر عەبادی سەرۆك وەزیرانی عێراق لە نیویۆرك كۆبوونەوە و تەوەری سەرەكی كۆبوونەوەكە پرۆسەی كۆنترۆڵكردنەوەی موسڵ و قۆناغی پاش رزگاركردنی ئەو شارە بوو لە دەست چەكدارانی داعش.
سەرۆكی ئەمریكا ئاماژەی بەوە كردووە كە پێویستە حكومەتی هەرێمی كوردستان و حكومەتی عێراقی هاوكاری یەكتربن لە قۆناغی پاش ئازادكردنی موسڵ و داوای لە كۆنگرێسی وڵاتەكەی و كۆمەڵگای نێودەوڵەتی كرد هاوكاری عێراق بكەن.
سەرۆكی ئەمریكا لە قسەكانیدا بە بایەخەوە باسی لە رۆڵی پێشمەرگە كرد و سوپاسی هێزەكانی پێشمەرگەی كوردستانی كرد لە رووبەرووبوونەوەی چەكدارانی داعشدا و رایگەیاند"هەمووان بە باشی لێكتێگەیشتنمان هەیە و سورین لەسەر دەركردنی داعش.
لە كۆبوونەوەكە سەرۆك وەزیرانی عێراق هیوای خواست لە چەند مانگی داهاتوودا داعش لە شاری موسڵ دەربكرێت و داوایكرد هەمووان هاوكاربن لەو بوارەدا.
بەگوێرەی زانیارییەكانی پەیامنێری كوردستان 24 لە نیویۆرك،حەیدەر عەبادی لە قسەكانیدا باسی پێشمەرگەی نەكردووە.
لەو دیدارەدا فوئاد حسێن سەرۆكی دیوانی سەرۆكایەتی هەرێمی كوردستان ئامادە بووە و ژمارەیەك لە بەرپرسانی هەر دوو وڵاتیش بەشداری كۆبوونەوەكەیان كردووە.