ھەرێمی كوردستان و ئێران دوو پرۆتۆكۆل واژوو دەكەن
لەكاتی واژووكردن تەنیا ئاڵای كوردستان و ئێران دانراوە
K24 - تاران
بە دانانی ئاڵای كوردستان و ئێران، دوو پرۆتۆكۆلی بازرگانی لەنێوان ھەرێمی كوردستان و ئێران واژووكرا.
پەیامنێری كوردستان24 لەتاران رایگەیاند: "بە بەشداری شاندێكی ھەرێمی كوردستان، ئەمڕۆ كۆنفرانسێكی ئابووری جیھان لە تاران بەڕێوەدەچێت و 24 وڵات بەشداریان لە كۆنفرانسەكەدا كردووە".
شێخ مستەفا عەبدولرەحمان، سەرۆكی یەكێتی ھاوردە و ھەناردەكارانی كوردستان بە كوردستان24 گوت: "شاندی ھاوردە و ھەناردەكاران و ژووری بازرگانی ھەولێر بە فەرمی بانگێشتی كۆنفرانسەكە كراوین، دوو پرۆتۆكۆل لە نێوان ھەرێمی كوردستان و ئێران واژووكرا، لە پرۆتۆكۆلەكەدا ھاتووە، بازرگانی لەنێوان ھەرێمی كوردستان و ئێران بەردەوام بێت، ھەروەھا ئاماژە بۆ ئەوەكراوە كاربكرێت بۆ ئەوەی نووسینگەی بازرگانانی ئێران لە ھەرێمی بكرێتەوە و بە پێچەوانەوە ھی ھەرێمی كوردستانیش لە ئێران بكرێتەوە، بۆ ئەوەی پەیوەندییە بازرگانییەكان بەردەوام بن و بەھێزتر بكرێ و لە ھیچ كاتێك كێشەی بۆ دروست نەبێت".