باره‌گاى بارزانى پرسه‌نامه‌يه‌ك ئاراسته‌ى خانه‌واده‌ى ته‌ڵعه‌ت سامان ده‌كات

K24 – هه‌ولێر:

باره‌گاى بارزانى له‌ پرسه‌ نامه‌يه‌كدا سه‌ره‌خۆشى له‌ خانه‌واده‌ى ته‌ڵعه‌ت سامان شانۆكار و ده‌رهێنه‌رى كورد ده‌كات، كه‌ دوێنێ له‌ ته‌مه‌نى 74 ساڵييدا به‌ هۆى رووداوێكى هاتوچۆوه‌ گيانى له‌ده‌ستدا.

ده‌قى پرسه‌ نامه‌كه‌:

به‌ناوی خودای گه‌وره و میهره‌بان

به‌ڕێزان له‌ خانه‌واده‌ی خوالێخۆشبوو ته‌لعه‌ت سامان

به‌بیستنی هه‌واڵی کۆچی دوایی ده‌رهێنه‌ر و شانۆکاری دیاری گه‌له‌که‌مان (ته‌ڵعه‌ت سامان) دڵگران بووین.

له‌ کایه‌ی هونه‌ری کوردی و به‌تاییه‌تی مێژووی شانۆی کوردی ناوی مامۆستا ته‌ڵعه‌ت و کاره‌ جوانه‌کانی بۆ خزمه‌تی میلله‌ته‌که‌ی و ره‌وتی هونه‌ری شانۆیی هه‌میشه‌ به‌ به‌رزی ده‌مێنێته‌وه‌.

به‌م بۆنه‌ خه‌مناکه‌وه‌ هاوبه‌شی خه‌می خانه‌واده‌ به‌ڕێزه‌که‌تانین و سه‌ره‌خۆشیمان ئاراسته‌ی ئێوه‌ و هونه‌رمه‌ندان و هونه‌ردۆستانی کوردستان ده‌که‌ین.

له‌ خودای مه‌زن داواکارین ئارامی و دڵنه‌وایی ببه‌خشێت به‌ هه‌موو لایه‌ک و خوالێخۆشبوو به‌ به‌هه‌شتی به‌رینی خۆی شاد بکات.

انا لله‌ وانا الیه‌ راجعون

باره‌گای بارزانی