سەرەخۆشیی مه‌سرور بارزانى بە بۆنەی كۆچی دوایی مامۆستا محەمەد مەلا قادر

K24 – هه‌ولێر:

له‌ په‌يامێكدا، مه‌سرور بارزانى، راوێژكارى ئه‌نجوومه‌نى ئاسايشى هه‌رێمى كوردستان، سه‌ره‌خۆشى له‌ بنه‌ماڵه‌ و كه‌سوكارى مامۆستا محه‌مه‌د مه‌لا قادر كرد و رايگه‌ياند، هەمیشە لە تۆماری خەباتی كوردستاندا ناوی بە زیندوویى دەمێنێتەوە.

ده‌قى پرسه‌نامه‌كه‌:

‎بەناوی خودای بەخشندە و میهرەبان 

‎خانەوادەی شۆڕشگێڕی ناسراوی ‎گەلەکەمان مامۆستا محەمەد مەلا قادر

‎بەداخ و پەژارەیەکی زۆرەوە هەواڵی كۆچی دوایی تێكۆشەر و شۆڕشگێڕی ناسراوی گەلەكەمان مامۆستا محەمەد مەلا قادرمان بیست. 

‎مامۆستا محەمەد مەلا قادر پێشمەرگەیەكی دێرین و كەسایەتییەكی شۆڕشگێڕ و نیشتیمانپەروەر و مرۆڤدۆست و هەقبێژی کاروانی کوردایەتی بوو، ڕۆڵی لە قۆناغە سەخت و جۆراوجۆرەكانی مێژووی خەباتی پارتی دیموكراتی كوردستان دیارە و نموونەی خۆراگریی و نیشتیمانپەروەری بوو، کە هەمیشە لە تۆماری خەباتی كوردستاندا ناوی بە زیندوویى دەمێنێتەوە. 

‎بەو بۆنە خەمناكەوە سەرەخۆشی لە خۆمان و خانەوادە و كەسوكار و جەماوەری پارتی و خەڵكی كوردستان دەكەین، لەخودای گەورە داواكارین مامۆستای خوالێخۆشبوو مەلا محەمەد بە بەهەشتی بەرین شاد بكات و ئۆقرەیی و دڵنەوایی بە هەموومان ببەخشێت.

‎براتان

‎مەسرور بارزانی 

‎15ی کانوونی دووەمی2019