سه‌رۆك بارزانی دڵنیایی ده‌داته كریستیانه‌كانی كوردستان
به بۆنه‌ی جه‌ژنی ئه‌كیتۆ پیرۆزبایی له خوشك و برایانی كلدان سریان ئاشووری ده‌كات
K24 - هه‌ولێر:
سه‌رۆك مه‌سعود بارزانی، له په‌یامێدا، به بۆنه‌ی هاتنه‌وه‌ی سەری ساڵی نوێی بابلی كلدانی سریانی ئاشووری و جەژنەكانی ئەكیتۆ, پیرۆزبایی له خوشك و برایانی كلدان سريان ئاشوورى ده‌كات و دڵنیاییش ده‌داته كرسیتیانه‌كان و رایده‌گه‌یه‌نێت، كوردستان وڵاتی خۆیانە و نابێ زێدی باب و باپیرانی خۆیان جێ بهێڵن.
ده‌قی په‌یامه‌كه‌ی سه‌رۆك بارزانی:
"بە ناوی خودای بەخشندە و میهرەبان
بە بۆنەی هاتنەوەی سەری ساڵی تازەی بابلی كلدانی سریانی ئاشووری و جەژنەكانی ئەكیتۆ، گەرمترین پیرۆزبایی خۆم ئاراستەی خوشك و برایانی كلدان سریان ئاشووریی كوردستان و عێراق دەكەم و هیوای شادی و بەختەوەرییان بۆ دەخوازم.
لەو بۆنەیەدا جەخت لە قووڵتركردنی كولتووری پێكەوەژیان و ئاشتی و برایەتی لەنێوان هەموو پێكهاتەكانی كوردستان دەكەینەوە و بە تایبەت خوشك و برا مەسیحییەكان لەوە دڵنیا دەكەمەوە كە كوردستان وڵاتی خۆیانە و نابێ زێدی باب و باپیرانی خۆیان جێ بهێڵن و پێویستە هەموومان وڵاتی خۆمان پێكەوە بەرەو پێشەوە ببەین.
ئومێدی ئەوەیش دەخوازم ئاوارە و پەنابەرەكان بەزووترین كات بگەڕێنەوە سەر ماڵ و حاڵی خۆیان لە پارێزگای نەینەوا و ناوچەكانی تر. هیوادارم ساڵی تازەتان پڕ بێ لە خۆشی و كامەرانی و هەموو جەژنەكانتان بە ئاشتی و ئاسوودەیی بە ڕێ بكەن.
مسعود بارزانی
31ـی 3ـی 2019"
