ئەمەریکا و ئێران لێدوانی جیاواز لەبارەی خستنە خوارەوەی فڕۆکەیەکی بێ فڕۆکەوان بڵاودەکەنەوە

K24 – هه‌ولێر:

وتەبێژی ھێزە چەكدارەكانی ئێران تێكشكانی فڕۆكەیەكی بێ فڕۆكەوانی وڵاتەکەی لەلایەن ئەمەریکاوە رەتدەكاتەوە و ئەمەریکاش سوورە لەسەر ئەوەی، فڕۆکەیەکی ئێرانیان خستووەتە خوارەوە.

بەیانی ئەمڕۆ 19/07/2019، ئەبولفەزل شكارچی، وتەبێژی ھێزە چەكدارەكانی ئێران وێرای پشتڕاستكردنەوەی ئۆپەراسیۆنی چاودێریكردنی ئاوەكانی کەنداو، لێدوانەكانی سەرۆكی ئەمەریكا و وەزارەتی بەرگری ئەمەریكاشی لەبارەی تێكشكاندنی فڕۆكەیەكی بێ فڕۆكەوانی ئێرانی لە نزیك كەشتی جەنگی یو ئێس ئێس باكسەر رەتکردەوە.

شکارچی رایگەیاند :"ھەموو فڕۆكە بێ فڕۆكەوانەكانی ئێران لەژێر كۆنترۆڵی ھێزەكانیان دایە و دوای پشكنینی وردی ناوچەكە و كەشتیە جەنگیەكە، فڕۆكە بێ فڕۆكەوانەكەیان بە سەلامەتی گەڕاوەتەوە و كەشتی باكسەر ھیچ بەرگریەكی نەكردووە.

وتەبێژی ھێزە چەكدارەكانی ئێران راشیگەیاندووە كە لێدوانەكانی ترامپ بە مەبەستی تێكدانی ئاسایشی ئاوەكانی كەنداو و گەرووی ھورموزە.

لای خۆیشیەوە، عەباس عێراقچی، جێگری وەزیری دەرەوەی ئێران رایگەیاندووە، ئەمەریکا فڕۆکەیەکی خۆی بە هەڵە خستووەتە خوارەوە و هیج فڕۆکەیەکی بێ فڕۆکەوانی ئێرانی زیانی بەر نەکەوتووە.

 BBC

France24

H.J