چەند پڵنگ و شێرێک تووشی ڤایرۆسی کۆرۆنا بوون

K24 – هه‌ولێر:

پڵنگێکی تەمەن چوار ساڵ لە باخچەی ئاژەڵانی برۆنکس لە نیویۆرکی ئەمەریکا، تووشی ڤایرۆسی کۆرۆنا بووە.

پڵنگەکە ناوی نادیایە و یەکەم ئاژەڵی کێوییە لە نیویۆرک تووشی ڤایرۆسەکە بووبێت.

جیا لە نادیا، شەش پشیلەی کێوییش، لە یەکێک لە کارمەندانی باخچەی ئاژەڵان ئەو ڤایرۆسەیان بۆ گوێزراوەتەوە و کۆکەی وشکیان هەیە.

پاول کەیل، بەڕێوەبەری باخچەکە بە ئاژانسی رۆیتەرزی گوتووە، یەکەمجارە دەبیستم کەسێك لەم جیهانە، نەخۆشییەکەی بۆ ئاژەڵان بگوازرێتەوە.

راشیگەیاند، تەنها نادیا پشکنینی بۆ کراوە و دەرکەوتووە تووشبووی ڤایرۆسی کۆرۆنایە، بەڵام خوشکێکی و دوو پڵنگی تر و سێ شێری ئەفریقیش، نیشانەی نەخۆشییەکەیان هەیە.

ئاماژە بەوەش دەکات، نازانین رەفتاری ئەم ڤایرۆسە لەگەڵ ئاژەڵان چۆن دەبێت، بەڵام بە وردی چاودێرییان دەکەین.

لە ئەمەریکا 336 هەزار و 830 حاڵەتی ڤایرۆسی کۆرۆنا هەیە، لەو ژمارەیەش، 123 هەزار و 18 کەسیان، لە نیویۆرک دەژین.

BBC