لە سۆران و راپەڕین ھیچ تووشبووێكی كۆرۆنا نەماوە
"ئەمڕۆ دوایین تووشبوو لە راپەڕین رەوانەی ماڵەوە دەكرێتەوە"
K24 - سۆران
ھەردوو بەڕێوەبەرایەتی تەندروستی سۆران و راپەڕین ئاشكرایان كرد، ھیچ تووشبووێكی ڤایرۆسی كۆرۆنا لەو دوو دەڤەرە نەماون.
د. كاروان جەمال، بەڕێوەبەری تەندروستی سۆران بە كوردستان24ی راگەیاند: "دوێنێ دوایین پشكنین بۆ بەركەوتووانی تووشبووی گوندێكی ناحیەی سیدەكان وەرگیراوە و ئەنجامی پشكنینەكە نێگەتیڤ بووە، ئێستا ھیچ حاڵەتێكی تووشبووی كۆرۆنا لە دەڤەری سۆران لە نەخۆشخانە نەماوە و ھەموویان چاكبوونەتەوە و رەوانەی ماڵەوە كراونەتەوە".
روونیكردەوە: "لە دەڤەری سۆران 12 كەس تووشی كۆرۆنا ببوون، دوای وەرگرتنی چارەسەر، ھەموویان چاكبوونەتەوە و رەوانەی ماڵەوە كرانەوە".
د. كاروان ئاماژەی بەوەشكرد: "ھەرچەندە سۆران ھاوسنوورە لەگەڵ ئێران و توركیا، بەڵام بەھۆی رێكارەكانی حكومەت توانرا، كۆرۆنا لە ناوچەكە كۆنترۆڵ بكرێت".
لەلایەكی دیكە د.هیوا مەحموود، بەڕێوەبەری گشتی تەندروستی راپەڕین لە كۆنگرەیەكی رۆژنامەوانیدا گوتی: "ئەمڕۆ دوایین تووشبووی كۆرۆنا لە دەڤەری راپەڕین رەوانە ماڵەوە دەكرێتەوە".
راشیگەیاند: "بە گرتنەبەری رێكارەكان و بە بڕیاری ژووری ئۆپەراسیۆنی بەرەنگاربوونەوەی كۆرۆنا، بە قۆناغ ژیانی ھاووڵاتییان ئاسایی دەكرێتەوە".