بڵند ئیسماعیل: مەسرور بارزانی لە کابینەی دەیەم کار لەسەر دروستکردنی ژێرخانێکی ئابووری بەهێز دەکات

بڵند ئیسماعیل، بەرپرسی لقی دووی پارتی دیموکراتی کوردستان لە هەولێر ڕایگەیاند: پارتی لە سەنتەری شاری هەولێر زیاتر لە 120 هەزار دەنگی بەدەستهێناوە، بە بەراورد بە هەڵبژاردنی پێشووتر 50 هەزار دەنگی زیاد کردووە.

بەرپرسی لقی دووی پارتی دەشڵێت: مەسرور بارزانی لە قۆناغی داهاتوو لە کابینەی دەیەمی حکوومەتی هەرێمی کوردستان، کار لەسەر دروستکردنی ژێرخانێکی ئابووری بەهێز دەکات.

بڵند ئیسماعیل گوتی: بە دەنگی تایبەت و گشتی، پارتی دیموکراتی کوردستان لە سەنتەری شاری هەولێر زیاتر لە 120 هەزار دەنگی هێناوە، بەراورد بە هەڵبژاردنی پێشووش، 50 هەزار دەنگی پارتی لە سەنتەری شاری هەولێر زیادی کردووە.

دەڵێت: دروشمی داهاتووی پارتی، قۆناغی ئاوەدانکردنەوە دەبێت، قۆناغی زیاتر جێگربوونی پێگەی هەرێمی کوردستان و قەوارەی هەرێمی کوردستان دەبێت، قۆناغی چارەکردنی کێشەکان دەبێت لەگەڵ بەغدا بەپێی دەستوور، بەتایبەت پرسی ماددەی 140 و کەرکووک، پێویستە کەرکووک لەو دۆخەی ئێستا تێیدا هەیە، دەربهێندرێت.

لە هەرێمی کوردستانیش قۆناغێکی باشتر لە ئاوەدانکردنەوە دەستپێدەکات، دەڵێت: دڵنیامە مەسرور بارزانی لە کابینەی دەیەم، کۆمەڵێک پرۆژەی ستراتیژی زۆر گەورە و زەبەلاحی لەبەردەستە کە لە رۆژهەڵاتی ناوەڕاست وێنەیان نەبێت لەڕووی گەشتیاریی و کشتوکاڵی و پیشەسازیی لەگەڵ هەموو ئەو فاکتەرانەی کە ژێرخانی ئابووری هەرێمی کوردستان پێش دەخات.