کۆمیسیۆن: هیچ سکاڵایەکی ڕەنگ سوورمان نییە و سبەینێ ئەنجامی سکاڵاکان ڕادەگەیەنین

کۆمیسیۆنی باڵای سەربەخۆی هەڵبژاردنەکانی عێراق ڕایدەگەیەنێت، هیچ سکاڵایەکی ڕەنگ سووریان لەسەر ئەنجامی هەڵبژاردنی پەرلەمانی کوردستانیان نییە و سبەینێ، ئەنجامی هەموو سکاڵاکان ڕادەگەیەنێت. 

ئەمڕۆ چوارشەممە، 23-10-2024، داوود سەلمان، بەڕێوەبەری ڕاهێنان و ڕێکارەکان لە کۆمیسیۆنی باڵای سەربەخۆی هەڵبژاردنەکانی عێراق بە ماڵپەری کوردستان24ـی ڕاگەیاند "لە هەردوو دەنگدانی تایبەت و گشتیی پەرلەمانی کوردستان، 189 سکاڵا لەلایەن حزب و لایەنە سیاسییەکانەوە لەسەر ئەنجامی هەڵبژاردنەکە تۆمار کراون". 

کۆمیسیۆنی باڵای سەربەخۆی هەڵبژاردنەکانی عێراق بۆ پێداچوونەوە بەو سکاڵایانەی لەسەر هەڵبژاردنی خولی شەشەمی پەرلەمانی کوردستان تۆمارکراون، سێ لیژنەی پێک هێناوە بۆ جیاکردنەوە و پلەبەندی جۆری سکاڵاکان.

ئەو بەرپرسەی کۆمیسیۆنی هەڵبژاردنەکانی عێراق باسی لەوەش کرد "پرۆسەی پێداچوونەوە و پلەبەندی سکاڵای لایەنە سیاسییەکان بەردەوامە؛ تاوەکوو ئێستە هیچ سکاڵایەکی ڕەنگ سوورمان نەبووە، تەنها سکاڵای ڕەنگ سەوز و زەرد هەیە". 

لەبارەی کاتی ڕاگەیاندنی ئەنجامی سکاڵاکان، داوود سەلمان ئەوەی خستە ڕوو "هەوڵ دەدەین ئەمڕۆ پرۆسەی پێداچوونەوە و پلەبەندی سکاڵاکان تەواو بکەین و سبەینێ پێنجشەممە، 24-10-2024، ئەنجامەکانیان بۆ ڕای گشتیی ڕابگەیەنین". گوتیشی "بە دووری دەزانم، ئەنجامی سکاڵاکان کاریگەرییان لەسەر ئەنجامی هەڵبژاردن و ژمارەی کورسیی لایەنە سیاسییەکان هەبێت". 

پێشتر جومانە غەلای، گوتەبێژی کۆمیسیۆنەکە بە کوردستان24ـی گوتبوو "ئەو سكاڵایانەی رەنگیان سەوز و زەردە كاریگەرییان لەسەر ئەنجامی هەڵبژاردنەكان نابێت، بەڵام سكاڵای سوور پێویستە لەلایەن ئەنجومەنی كۆمسیارانەوە بڕیاری لەبارەوە بدرێت بۆی هەیە كاریگەری لەسەر ئەنجامی هەڵبژاردنەكان هەبێت".

ڕۆژی هەینی، 18-10-2024، دەنگدانی تایبەت و ڕۆژی یەکشەممەش، 20-10-2024، دەنگدانی گشتیی بۆ هەڵبژاردنی خولی شەشەمی پەرلەمانی کوردستان بەڕێوە چوو. بە گوێرەی ئامارەکانی کۆمیسیۆنی باڵای سەربەخۆی هەڵبژاردنەکانی عێراق، بە تێکڕا نزیکەی 70%ـی دەنگدەران بەشدارییان لە هەردوو دەنگدانەکەدا کردووە. 

ژمارەی کورسیی لایەنە سیاسییەکان بەپێی ئەنجامی بەرایی:

 پارتی دیموکراتی کوردستان: 39 کورسی 

یەکێتیی نیشتمانیی کوردستان: 23 کورسی

جووڵانەوەی نەوەی نوێ: 15 کورسی 

یەکگرتووی ئیسلامیی کوردستان: 7 کورسی

ڕەوتی هەڵوێست: 4 کورسی

کۆمەڵی دادگەریی کوردستان: 3 کورسی

بەرەی گەل: 2 کورسی

بزووتنەوەی گۆڕان: 1 کورسی

هاوپەیمانیی هەرێمی کوردستان: 1 کورسی

کۆتای پێکهاتەکان: 5 کورسی

ژمارەی دەنگی لایەنە سیاسییەکان بە گوێرەی ئامارە بەراییەکان:

پارتی دیموکراتی کوردستان: 809,197 دەنگ

یەکێتیی نیشتمانیی کوردستان: 408,141 دەنگ

جووڵانەوەی نەوەی نوێ: 290,991 دەنگ

یەکگرتووی ئیسلامیی کوردستان:  116,981 دەنگ 

ڕەوتی هەڵوێست: 55,775 دەنگ

کۆمەڵی دادگەریی کوردستان: 64,710  دەنگ

بەرەی گەل: 33,365 دەنگ

بزووتنەوەی گۆڕان: 11,621 دەنگ

هاوپەیمانیی هەرێمی کوردستان: 12,929دەنگ

بزووتنەوەی ئیسلامیی کوردستان: 5,503 دەنگ