کوردستان و ئیسپانیا کار لە بواری وزەی نوێ و سامانی ماسی و ئاژەڵداری دەکەن
وەزارەتی کشتوکاڵ و سەرچاوەکانی ئاوی حکومەتی هەرێمی کوردستان و پەیمانگای گەشەپێدانی بازرگانی هەرێمی مورسیا لە وڵاتی ئیسپانیا کاری داهێنانی کشتوکاڵی، کەرتی خۆراکی کشتوکاڵی، ئاو و وزەی نوێبووەوە، ئاژەڵداری، سامانی ماسی و ڕاهێنانی کشتوکاڵی بەیەکەوە دەکەن.
دووشەمە 28ـی تشرینی یەکەمی 2024، لەمیانەی سەردانە فەرمییەکەیدا بۆ ئیسپانیا، بێگەرد تاڵەبانی، وەزیری کشتوکاڵ و سەرچاوەکانی ئاو، بریکاری وەزارەت و دارەوان حاجی حامید نوێنەری حکومەتی هەرێمی کوردستان لە ئیسپانیا و پورتوگال، سەردانی پەیمانگای گەشەپێدانی کشتوکاڵ و بازرگانی هەرێمی مورسیایان کرد و لەلایەن سەرۆکی پەیمانگا خواکین گۆمێز و تیمەکەی پێشوازیان لێکرا.
بەپێی ڕاگەیەندراوی وەزارەتەکە، لە دیدارەکەدا پڕۆژەکانی هاریکاری داهاتووی نێوان هەرێمی کوردستان و هەرێمی مۆرسای ئیسپانیا لە بوارە هاوبەشەکانی وەک داهێنانی کشتوکاڵی، کەرتی خۆراکی کشتوکاڵی، ئاو و وزەی نوێبووەوە، ئاژەڵداری، سامانی ماسی و ڕاهێنانی کشتوکاڵی تاوتوێ کران.
هاوکات بڕیاردرا تیمێکی هاوبەش لە نێوان هەردوولا پێکبهێنرێت بۆ پەرەپێدانی کەرتی کشتوکاڵ و بازرگانی نێوان هەردوولا.