تۆڕی سووریی مافەکانی مرۆڤ: هێزە ئەمنییەکانی حکوومەتی کاتی، هاووڵاتییان ئەشکەنجە دەدەن
تۆڕی سووریی مافەکانی مرۆڤ داوا لە حکوومەتی کاتیی سووریا دەکات هاووڵاتییانی سڤیل لە ئۆپەراسیۆنە ئەمنییەکان بپارێزێت و ڕێگریی لە پێشێلکارییەکان بکات.
تۆڕەکە، بە پشتبەستن بە چەندان سەرچاوەی باوەڕپێکراو، لە ڕاپۆرتێکدا ئاماژەی بەوە کردووە، لە ئۆپەراسیۆنێکی ئەمنیدا لە پارێزگای حومس، هێزە ئەمنییەکان پێشێلکارییان کردووە، هاووڵاتییانی سڤیلیان ئەشکەنجە داوە و بێڕێزیشیان بەرانبەر بە سیمبۆل و شوێنە ئایینەکان کردووە.
لە ڕاگەیەندراوەکەدا ئەوەش خراوەتە ڕوو، هێزە ئەمنییەکان لە حومس، خانووی هاووڵاتییانیان تێک داوە، بێڕێزییان بەرانبەر بە خاوەنەکانیان کردووە و هەڕەشەیان لە هاووڵاتییانی سڤیل لە پێکهاتەی عەلەوی کردووە.
تۆڕی سووریی مافەکانی مرۆڤ داوا لە حکوومەتی کاتیی وڵاتەکە دەکات ڕێگریی لەو پێشێلکارییانە بەرانبەر بە هاووڵاتییانی سڤیل بکات و سەرپێچیکاران سزا بدات.