لە گوندێکی سەیدسادق گەنجێک ئەندامانی خێزانەکەی کومەڵکوژ کرد

لە گوندی گرێزەی سنووری شارۆچکەی سەیدسادق لە سنووری پارێزگای سلێمانی، لە ڕووداوێکدا گەنجێک بە دەسڕێژی گوللە پێنج ئەندامی خێزانەکەی کوشت و دواتر خۆیشی کوشتووە.

بە گوێرەی زانیارییەکانی کوردستان24، ڕووداوەکە نزیک کاتژمێر 12:00ی شەوی ڕابردوو، بەهۆی کێشەیەکی کۆمەڵایەتی و دەمەقاڵەی نێوان ئەندامانی خێزانەکەوە بووە و گەنجەکە بە کڵاشینکۆف دەسڕێژی لە باوکی و دایکی دوو خوشکی و برایەکی کردووە و سەرجەمیانی کوشتووە، دواتریش کۆتایی بە ژیانی خۆی هێناوە و باس لەوە دەکرێت، ئەو گەنجەی ئەندامانی خێزانەکەی کۆمەڵکوژ کردووە، چەند ساڵێک لە دەرەوەی وڵات و لە بەریتانیا ژیاوە و چەند ڕۆژێکە بەسەردان گەڕاوەتەوە.

دوای ڕووداوەکە، تەرمەکان گواستراونەتەوە نەخۆشخانەی گشتیی سەیدسادق و لە وێشەوە براونەتە پەیمانگەی پزیشکی دادی سلێمانی، دوای توێکاری، تەرمەکان ڕەوانەی گوندی گرێزە کراونەتەوە.

هەر بە گوێرەی زانیارییەکان، سەرۆکی خێزانەکە، کە ناوی سالار محەممەدە تەمەنی 50 ساڵە و بەهۆی ئەوەی فەرمانبەری فەرمانگەی کارەبا بووە بە سالاری کارەبا ناسراو بووە، هەروەها چەند ڕۆژێک لەمەوبەر لە یەکێک لە نەخۆشخانەکانی شاری سلێمانی نەشتەرگەری دڵی بۆ کراوە.

سەبارەت بە ڕووداوەکە، پۆلیس و لایەنە پەیوەندیدارەکان هیچ زانیاریی و ڕاگەیەندراوێکیان بڵاو نەکردووە و تەنیا ئەوەی هەیە زانیاریی خزم و کەسە نزیکەکانی ئەو خێزانەیە، گوایە کێشەکە لەسەر دابەشکردنی موڵک و میراتی بووە و بەرەبەیانی ئەمڕۆکە لە گۆڕستانی گوندی گرێزە تەرمی هەر شەش کەسی خێزانەکە لە تەنیشت یەک بەخاک سپێردران.

ناوی کوژراوەکان:

سالار محەممەد 50 ساڵ – سەرۆکی خێزان

نیهایەت قادر – هاوژینی سالار و دایکی منداڵەکان

سەهەند سالار 14 ساڵ 

یارا سالار 8 ساڵان

سیما سالار

ناوی ئەو کوڕەی ئەندامانی خێزانەی کوشتووە:

بەشیر سالار 22 ساڵ دانیشتووی بەریتانیا