دابەشكردنی پارەی گەنمی جوتیاران دەست پێدەكات

K24 – ھەولێر

لە كۆتایی ھەفتەی رابردوو پڕۆسەی وەرگرتنی گەنمی جوتیاران لە ھەرێمی كوردستان كۆتایی پێھات و لە چەند رۆژی داھاتوودا دەست دەكرێت بە دابەشكردنی پارەی گەنمی ئەمساڵی جوتیاران.

ھێمن سەید موراد، بەڕێوەبەری چاودێری بازرگانی ھەولێر بە كوردستان24ی راگەیاند: "لە 6ی ئەم مانگە پرۆسەی وەرگرتنی گەنمی جوتیاران كۆتایی پێھات و ھیچ بڕە گەنمێك رەوانەی شارەكانی دیكەی عێراق نەكراوە، بەڵكو ھەمووی لە سایلۆكانی ھەرێمی كوردستان ھەڵگیراوە".

گوتیشی: "بۆ سنووری ھەولێر 110 ھەزار تۆن بۆ وەرگرتنی گەنمی جوتیاران دیاركرابوو، لەو بڕە 109 ھەزار و 965 تۆنمان وەرگرتووە".

سەبارەت بە وەرگرتنی گەنمی جوتیاران لەلایەن ھەندێك كۆمپانیا بۆ ئەوەی ئەو بڕەی ماوەتەوە ئەویش وەربگیرێت، بەڕێوەبەری چاودێری بازرگانی ھەولێر گوتی: "ئەمە یەكێكە لە پلانەكانی حكومەتی ھەرێمی كوردستان، بۆ ئەوەی جوتیاران زەرەر نەكەن، لەو بڕیارەی كە حكومەتی عێراق داویەتی و بڕێكی دیاركردووە و لە ئاست بەرھەمی جوتیاران كەمە، ئێستا كارگەكانی ئالیك بەردەوام گەنمی جوتیاران وەردەگرن، بەڵام بەھۆی ئەم دۆخە تائێستا نەتوانراوە پلانەكەی دیكە جێبەجێ بكرێت، كە وەرگرتنی گەنمی جوتیارانە لە لایەن كۆمپانیاكان".

باسی لەوەشكرد: "تائێستا حكومەتی عێراق 2 ملیار دیناری بۆ كڕینەوەی گەنمی ئەمساڵی جوتیاران رەوانەی بانكەكانی ھەرێمی كوردستان كردووە و لە رۆژانی داھاتوودا دەست دەكەین بە دابەشكردنی، بڕیارەی بە قۆناغ ھەموو پارەكە رەوانە بكات".

ھ.م