وەزارەتی نەوتی عێراق: له‌گه‌ڵ حكوومه‌تی هه‌رێم و كۆمپانیا نەوتییەکان ڕێكده‌كه‌وین
بریکاری وەزارەتی نەوتی عێراق، دەڵێت: هەموو ئاسانکارییەکمان بۆ هەناردەکردنەوەی نەوت کردووە، لە چەند ڕۆژی داهاتووشدا لەگەڵ حکوومەتی هەرێم و کۆمپانیا نەوتییەکان ڕێکدەکەوین.
شەممە 6ـی ئەیلوولی 2025، باسم خزەیر، بریکاری وەزارەتی نەوتی عێراق، لە وەڵامی کوردستان24، ڕایگەیاند: پرسی هەناردەکردنەوەی نەوت زیاتر پشت بە حکوومەتی هەرێم و کۆمپانیاکان دەبەستێت، ئێمە هەموو ئاسانکارییەکمان کردووە بۆ وەرگرتنی نەوتی هەرێم و هەناردەکردنەوەی.
بریکاری وەزارەتی نەوتی عێراق، ئاماژەی بەوە دا، پشتیوان بە خوا لە چەند رۆژی هاتوودا، لەگەڵ حکوومەتی هەرێم و کۆمپانیا نەوتییەکان دەگەینە ڕێککەوتن لەسەر ئەو پرسە.
هەر ئەمڕۆ عەلی نزار، بەڕێوەبەری گشتیی کۆمپانیای بە بازاڕکردنی نەوتی عێراق (سۆمۆ)، لە وەڵامی شڤان جەباری، پەیامنێری کوردستان24ـدا، گوتبووی: لە لایەن ئێمەوە لە بارەی ڕێككەوتن و گرێبەستەكان هەموو شتێك تەواو كراوە و هەموو ئامادەكارییەك بۆ دەستپێكردنەوەی هەناردەی نەوت لە ڕێگەی بەندەری جەیهانەوە کراوە.
بەڕێوەبەری گشتیی کۆمپانیای سۆمۆ، باسی لەوەش کردبوو، ئێستا ئێمە چاوەڕێین نەوتمان بۆ بنێرن، هەروەها وەزارەتەکانی سامانە سروشتییەکان و نەوت هەموو هەوڵێکیان بۆ دووبارە هەناردەکردنەوەی نەوت خستووەتەگەڕ.
