نێچیرڤان بارزانی و سەرۆکی هاوپەیمانیی عەزم پەیوەندییەکانی هەولێر و بەغدایان تاوتوێ کرد
سەرۆکی هەرێمی کوردستان و سەرۆکی هاوپەیمانیی عەزم هەڵبژاردنی گشتیی داهاتووی عێراق، پەیوەندییەکانی هەولێر و بەغدا و دۆخی پێکهاتەکان لە عێراق، تاوتوێ کرد و هاوڕا بوون لەسەر گرنگیی چارەسەرکردنی کێشەکانی وڵات بەتایبەتی کێشەکانی هەولێر و بەغدا.
سەرۆکایەتی هەرێمی کوردستان ڕاگەیەندراوێکی بڵاو کردووەتەوە و تێیدا ئاماژەی داوە، پاشنیوەڕۆی ئەمڕۆ یەکشەممە 28ـی ئەیلوولی 2025، نێچیرڤان بارزانی، سەرۆکی هەرێمی کوردستان، پێشوازیی لە موسەننا سامەڕائی سەرۆکی هاوپەیمانیی عەزم کرد.
سەرۆکایەتی هەرێم ڕایگەیاندووە، لە دیدارێکدا دۆخی سیاسیی عێراق و هەڵبژاردنی گشتیی داهاتووی عێراق، پەیوەندییەکانی هەولێر و بەغدا و دۆخی پێکهاتەکان لە عێراق، تاوتوێ کران.
بەگوێرەی ڕاگەیندراوەکە، هەردوولا جەختیان لە گرنگیی هاریکاریی هاوبەش و کاری پێکەوەیی لە نێوان تەواوی پێکهاتەکانی عێراق کردەوە کە ئارامی و سەقامگیریی وڵات دەپارێزێت. هەروەها هاوڕا بوون لەسەر گرنگیی چارەسەرکردنی کێشەکانی وڵات بەتایبەتی کێشەکانی هەولێر و بەغدا.
سەرۆکایەتی هەرێم دەشڵێت: لە تەوەرێکی دیکەی دیدارەکەدا هەردوولا بەشداریی هێز و لایەنە سیاسییەکان و پێکهاتەکانی عێراق لە هەڵبژاردنی داهاتووی ئەنجوومەنی نوێنەرانی عێراقدا بە پێویست زانی بۆ سەرکەوتنی هەڵبژاردن و پرۆسەی سیاسی لە وڵات.
