وەزارەتی پێشمەرگە: دانوستانەکانی ئەمەریکا، کوردستان و عێراق بۆ هەماهەنگی نێوانیان دەستی پێکردووەتەوە
وەزارەتی پێشمەرگە ڕایگەیاند، ئەمەریکا و عێراق بە ئامادەبوونی سوپاسالاری ئەو وەزارەتە دانوستانەکانیان دەست پێکردووەتەوە. هاوکات ئاماژەشی داوە، پێشمەرگە لە ڕێککەوتنی ستراتیژیی نێوانیان بەشدار دەبێت.
هەینی 7ـی تشرینی دووەمی 2025، وەزارەتی پێشمەرگە ڕاگەیەندراوێکی بڵاو کردووەتەوە و تێیدا ئاماژەی داوە، گەڕێکی دیکەی دانوستانەکانی نێوان ئەمەریکا و عێراق دەستی پێکردووەتەوە. لەم چوارچێوەیەدا، بەرپرسانی باڵای هەر دوو وڵات لە 6ـی تشرینی دووەمی 2025 ڕاوێژێکی تەکنیکیان سەبارەت بە داهاتووی پەیوەندییەکانی هەر دوو لا بە بەشداریی عیسا عوزێر، سوپاسالاری وەزارەتی پێشمەرگە ئەنجامدا.
لە ڕاگەیەندراوەکەدا هاتووە، نوێنەرانی هەر دوو حکوومەتی هەرێمی کوردستان و عێراق و بەرپرسانی باڵای ئەمنی و سەربازی لە چەند مانگی داهاتوودا لە بەهێزکردنی هاوکارییە ئەمنییە درێژخایەنەکان لە نێوانیاندا بۆ بەرەنگاربوونەوەی تیرۆر و پاڵپشتیکردن، بەرگریکردن و بەرزکردنەوەی توانا و ئامادەیی هێزەکانی ئاسایش و ئەمنیی عێراق، بە هێزی پێشمەرگەشەوە بەردەوام دەبن.
باسی لەوە کردووە، ئەم هاوکارییانە بۆ بەرەوپێشبردنی بەرژەوەندییە هاوبەشەکان، پاراستنی سەروەریی عێراق و تێکشکاندنی تیرۆرە.
هاوکات باڵیۆزخانەی ئەمەریکا لە بەغدا ڕاگەیەندراوێکی هاوبەشی تایبەت بە ڕاوێژی دوو لایەنە لە بواری ئاسایش لە ئەمەریکا و عێراق بڵاو کردووەتەوە و تێیدا ئاماژەی داوە، 6ی تشرینی دووەمی 2025 لە بەغدا، پەیوەست بە ڕێککەوتنی چوارچێوەی ستراتیژیی ساڵی 2008 و بە لەبەرچاوگرتنی ئاسایشی نەتەوەیی هاوبەشی هەر دوو وڵات، بەرپرسانی باڵای ئەمەریکا و عێراق ڕاوێژێکی تەکنیکیان لەبارەی پەیوەندیی داهاتووی نێوان هەر دوو وڵاتمان لە بواری ئاسایش کرد.
باسی لەوەش کردووە، بەشداربووان پابەندبوونی بەردەوامی خۆیان بۆ دانانی بناغەی قۆناغێکی نوێ لە هەماهەنگی لە بواری ئاسایش لە نێوان ئەمەریکا و عێراق کە بەردەوامی بدات بە توانای پێدانی عێراق بۆ دابینکردنی ئاسایشی خۆی و ببێتە هۆی بەدەستهێنانی سوودی بەرجەستە بۆ هەر دوو لا پیشان داوە.
هەروەها لە ڕاگەیەندراوەکەدا هاتووە، بەرپرسانی باڵا لە ڕاوێژەکانیان لە چەند مانگی داهاتوودا بە ئامانجی هەماهەنگیی درێژخایەن لە بواری ئاسایش و ڕووبەڕووبوونەوەی تیرۆر کە ببێتە هۆی بەهێزکردن و پاڵپشتیکردنی تواناکان و ئامادەیی هێزە ئەمنییەکانی عێراق و لە ناویاندا هێزی پێشمەرگە و هەروەها تا ببێتە هۆی برەودان بە بەرژەوەندییە هاوبەشەکانمان لە پارێزگاریکردن لە سەروەریی عێراق و شکستپێهێنانی بە تیرۆر و پتەوکردنی سەقامگیریی هەرێمایەتی و بەهێزکردنی پەیوەندییە ئابوورییەکانی نێوان هەر دوو وڵات بەردەوام دەبن.