پارتی: هەوڵێک هەیە بۆ دەستوەردان لە ئەنجامی هەڵبژاردن
مەكتەبی سیاسیی پارتی دیموكراتی كوردستان، ئاشکرای کرد، هەواڵێك هەیە بۆ دەستوەردان لە ئەنجامی هەڵبژاردن. جەختی لەوە کردەوە، بە هیچ شێوەیەك دەستوەردان و گۆڕینی ئەنجامی هەڵبژاردن بە گشتی و كۆتاكان بە تایبەتی، قبووڵكراو نین.
سێشەممە، 18ـی تشرینی دووەمی 2025، مەكتەبی سیاسیی پارتی دیموكراتی كوردستان، لە ڕاگەیەنراوێکدا ئاماژەی بەوە دا، پرۆسەی هەڵبژاردنی خولی شەشەمی پەرلەمانی عێراق، لە كەشوهەوایەكی دیموكراسییانە، ئازادانە و بە ڕێكوپێكی و شەفافانە بەڕێوە چوو.
لە ڕاگەیەنراوەکەدا هاتووە، لیست و قەوارە سیاسییەكان و کاندیدی كۆتاكان بە گوێرەی یاسا بەركارەكان و ڕێنماییەكان بەشدارییان لە هەڵبژاردن كرد.
مەكتەبی سیاسیی پارتی دیموكراتی كوردستان، ئاشکرای کرد، لێرە و لەوێ گوێبیست دەبین كە هەوڵێک هەیە بۆ دەستوەردان لە ئەنجامی هەڵبژاردن، بە تایبەتی كۆتاكان و گۆڕینی ئەنجام.
هاوکات جەختی لەوە کردەوە، وەک مەكتەبی سیاسیی پارتی بە هیچ شێوەیەك دەستوەردان و گۆڕینی ئەنجامی هەڵبژاردن بە گشتی و كۆتاكان بە تایبەتی قبووڵكراو نین و بە هێڵی سووری دادەنێین.
مەكتەبی سیاسیی پارتی، باسی لەوە کردووە، لە ئەگەری دەستوەردان و گۆڕانكاری لە ئەنجامە ڕاگەیاندراوەکان لە لایەن كۆمسیۆنی هەڵبژاردنەکانی عێراق، هەڵوێستی سیاسی جیددیمان دەبێت.
