سەرۆک بارزانی و سام دەرمۆ پرسی پێکهاتەکان و بارودۆخی سیاسییان تاوتوێ کرد
سەرۆک بارزانی پێشوازی لە سەرۆکی دامەزراوەی ئاشورییەکان لە پێناو دادوەری لە ئەمەریکا کرد.
ئەمڕۆ دووشەممە 5ی کانوونی دووەمی 2026، لەڕاگەیاندراوێکدا بارەگای بارزانی ڕایگەیاند؛ لە پیرمام سەرۆک مەسعود بارزانی پێشوازی لە سام دەرمۆ سەرۆکی دامەزراوەی ئاشورییەکان لە پێناو دادوەری لە ئەمەریکا کرد.
لە ڕاگەیەندراوەکەی بارەگای بارزانیدا هاتووە؛ لە دیدارەکەدا، سام دەرمۆ، ستایشی ڕۆڵ سەرۆک بارزانی کرد لە پاڵپشتی بەردەوامییان بۆ پێکهاتە ئایینی و نەتەوەییەکان و هەروەها سوپاسی پشتگیریی سەرۆک بارزانی کرد لە کردنەوەی مۆنیۆمێنتی یادەوەری شەهیدی ئاشوری کە دوێنێ بەردی بناغەی دانرا و ئەم پڕۆژەیەی بە مێژوویی وەسف کرد.
لای خۆیەوە سەرۆک بارزانی پشتیوانیی خۆی بۆ ئاشوورییەکان و هەموو پێکهاتەکانی تر دووپات کردەوە و ئاماژەی بەوە دا کە لە سەردەمی شێخ عەبدولسەلام بارزانی و شێخ ئەحمەد بارزانی، گرنگی بە پاراستنی یەکسانی و دادپەروەری مافی نەتەوە و ئایینە جیاوازەکانی کوردستان دراوە.
هەروەها بارودۆخی سیاسی عێراق و ناوچەکە و گۆڕانکارییەکانی ناوچەکە بە گشتیی خرانە بەرباس و گفتوگۆ.
