سەرۆک بارزانی داوای ئاگربەستی دەستبەجێ لە ڕۆژئاوای کوردستان دەکات

سەرۆک مەسعود بارزانی لە پەیامێکدا ڕایگەیاند: بە نیگەرانییەکی زۆرەوە و بە وردی بەدواداچوون بۆ دوایین پەرەسەندن و ڕووداوەکانی سووریا و ڕۆژئاوای کوردستان دەکەن. 

سەرۆک بارزانی جەخت دەکاتەوە لەوەی، هەموو هەوڵێکی خۆیان خستووەتەگەڕ و بەردەوامن لە کارکردن بۆ ئەوەی ڕێگری بکەن لەوەی خوشک و برایانمان لە ڕۆژئاوا تووشی هیچ جۆرە کارەسات و نەهامەتییەک ببن.

لە پەیامێکدا بۆ ڕای گشتی، سەرۆک بارزانی داوای لە هەموو لایەک کرد، لەم بارودۆخە هەستیارەدا بە بەرپرسیارێتییەکی زۆرەوە و دوور لە هەستی سۆزداری ڕەفتار بکەن، ئاماژەی بەوەش کرد کە نابێت کارێک بکرێت زیان بە کوردانی ڕۆژئاوا بگات، چونکە زیانگەیاندن بەوان بە هیچ شێوەیەک قابیلی قبوڵ نییە و دەبێت پارێزگارییان لێ بکرێت.

سەرۆک بارزانی هۆشدارییەکی جددی دا لەبارەی دروستبوونی مەترسی سەرهەڵدانەوەی داعش و گروپە تیرۆریستییەکان لە ئەنجامی ئەو ئاڵۆزییانەی کە ئێستا لە ناوچەکەدا لە ئارادان، سەرۆک بارزانی ڕوونیکردەوە، ئەم دۆخە هەڕەشەیەکی ڕاستەوخۆیە بۆ سەر سەقامگیری و ئاسایشی ناوچەکە، بۆیە پێویستە بە خێرایی ڕێگری لە قووڵبوونەوەی زیاتری ئاڵۆزییەکان بکرێت.

لە پەیامەکەیدا، سەرۆک بارزانی داوای لە کۆمەڵگەی نێودەوڵەتی و هێزە هاوپەیمانەکان کرد، بەرپرسیارێتی خۆیان جێبەجێ بکەن و بەپەلە کار بکەن بۆ ڕاگرتنی شەڕ و پێکدادانەکان، هەروەها جەختی لەسەر پێویستی ڕاگەیاندنی ئاگربەستێکی سەرتاسەری و چارەسەرکردنی کێشەکان لەڕێگەی گفتوگۆ و دیالۆگی ئاشتیانەوە کردەوە.

ئەم پەیامەی سەرۆک بارزانی لە ڕێکەوتی 20ی 1ی 2026 بڵاوکرایەوە، لە کاتێکدایە کە ناوچەکە ڕووبەڕووی گۆڕانکارییەکی خێرا بووەتەوە و هەوڵە دیپلۆماسییەکان بۆ پاراستنی سەقامگیری و ڕێگری لە کارەساتی مرۆیی لە ڕۆژئاوای کوردستان چڕتر بوونەتەوە.

ئەمە دەقی پەیامەکەیە:

 بەناوی خودای بەخشندە و میهرەبان

 بە نیگەرانییەكی زۆرەوە و بەوردی بەدواداچوون بۆ دوایین پەرەسەندن و ڕووداوەكانی سووریا و ڕۆژئاوا دەكەین، لەو بارودۆخە هەستیارەدا پێویستە هەموو لایەك بەرپرسیارانە و دوور لە عاتیفە ڕەفتار بكات و وای لێ نێت زیان بە خوشك و برایانمان لە ڕۆژئاوا بگات، كە بە هیچ شێوەیەك قابیلی قبوڵ نابێت. 

ئێمە هەموو هەوڵی خۆمان خستووەتەگەڕ و بەردەوامین كە خوشك و برایانمان لە ڕۆژئاوا تووشی كارەسات و نەهامەتی نەبن.

 لەلایەكی ترەوە لەو بارودۆخە ئاڵۆزەی دروست بووە، مەترسیی سەرهەڵدانەوەی داعش و تیرۆریش لە ئارادایە كە خۆی لەخۆیدا هەڕەشەیەكی زۆر جددییە لەسەر سەقامگیری و ئاساییشی ناوچەكە. لێرەدا داوا لە كۆمەڵگەی نێودەوڵەتی و هاوپەیمانان دەكەین كە بە بەرپرسیارێتیی خۆیان هەڵبستن و دەستبەجێ گرژی و شەڕ و پێكدادانەكان ڕابگیرێن و ئاگربەسێكی سەرتاسەری ڕابگەینرێت و كێشەكان بە شێوازێكی ئاشتیانە و لەڕێگەی حیوارەوە چارەسەر بكرێن. 

مسعود بارزانی 

20ی كانوونی دووەمی 2026