راگەیەندراوێک لە وەزیری تەندروستییەوە لەبارەی سەرهەڵدانی ڤایرۆسێکی نوێ

K24 - هەولێر

وەزیری تەندروستی داوا دەکات رێوشوێنی پێویست بگیرێتەبەر بۆ هەر ئەگەرێکی سەرهەڵدانی ڤایرۆسێکی نوێ "کە ئێستا لە وڵاتی بەریتانیا راگەیەندراوە".

سامان بەرزنجی، وەزیری تەندروستیی هەرێمی کوردستان نووسراوێکی بۆ بەڕێوەبەرایەتییەکانی تەندروستیی هەرێمی کوردستان ناردووە لەبارەی ئامادەکاری بۆ هەر ئەگەرێکی سەرهەڵدانی ڤایرۆسێکی نوێ.

وەزیری تەندروستی دەڵێ "پێویستە بە وردی چاودێریی هەموو ئەو گەشتیار و کەسانە بکەن، کە راستەوخۆ یان ناڕاستەوخۆ لەڕێگەی فڕۆکەخانەکان، یان دەروازە سنوورییەکان لە بەریتانیا دەگەڕێنەوە هەرێمی کوردستان".

وەزیری تەندروستی داوا لە بەڕێوەبەرایەتییەکانی تەندروستی دەکات "کاری پێویست ئەنجامبدەن بۆ تۆمارکردن و چاودێریکردنی تەندروستییان لەکاتی ئێستا بۆ پشکنینین و پەیوەندیکردن پێیانەوە". هەروەها دەڵێ "دواتر لە رێکاری پێویست ئاگادارتان دەکەینەوە".

دوێنێ مات هانکۆک، وەزیری تەندروستیی بەریتانیا رایگەیاند جۆرێکی نوێی ڤایرۆسی کۆرۆنا لە وڵاتەکەی بڵاوبووەتەوە و لە کۆنترۆڵ دەرچووە، بەو هۆیەوە زیاتر لە 20 وڵاتی جیهان فڕۆکەخانەکانیان بەڕووی بەریتانیا داخست.

د. ئاسۆ حەوێزی، گوتەبێژی وەزارەتی تەندروستیش لە راگەیەندراوێکدا دەڵێ "وەزارەتی تەندروستی یەکەمین قۆناغی رێکاری تەندروستی دەستپێدەکات بۆ ئەگەری ڤایرۆسێکی نوێ کە لە وڵاتی بەریتانیا سەریهەڵداوە. وەکو دەستپێک چاودێری تەندروستی هەر کەسێک دەکرێت، کە ڕاستەوخۆ یان ناڕاستەوخۆ لە وڵاتی بەریتانیا بگەڕێتەوە هەرێمی کوردستان".

ئەوەی لەبارەی نەوە نوێیەکەی ڤایرۆسی کۆرۆنا دەیزانین

کلیک بکە بۆ خوێندنەوەی راپۆرتەکە:
نەوەیەکی نوێی کۆرۆنا سەرهەڵدەدات؛ ئەوەش راستییەکەیەتی، بێ کەم و زیاد