وەزارەتی ئەوقافی هەرێمی کوردستان: سبەی تەواوکەری مانگی رەمەزانە

لیژنەی باڵای بینینی مانگ لە وەزارەتی ئەوقاف و کاروباری ئایینیی هەرێمی کوردستان، دوای چاودێریکردنی وردی ئاسمان، رایگەیاند کە بەهۆی نەبینینی مانگی شەوالەوە، رۆژی پێنجشەممە جەژن نییە و دەبێتە تەواوکەری مانگی رەمەزان.

ئێوارەی ئەمڕۆ چوارشەممە، 18ـی ئاداری 2026، پشتیوان سادق، وەزیری ئەوقاف و کاروباری ئایینیی هەرێمی کوردستان، لە کۆنفراسنێکی رۆژنامەوانیدا، گوتی: "دوای ئەوەی لە سەرجەم پارێزگا و ئیدارە سەربەخۆکانی هەرێمی کوردستان لە رێگەی لیژنە لاوەکییەکان چاودێری بینینی مانگ کرا، بەڵگەی شەرعی بینینی هیلالی مانگی شەووال نەسەلمێنرا."

وەزیری ئەوقاف، ئاماژەی بەوە کرد، کە بە پشت بەستن بە بەڵگەکان لیژنەی باڵا رایدەگەیەنێت، "سبەی پێنجشەممە، دەبێتە تەواوکەری مانگی پیرۆزی رەمەزان و، رۆژی هەینی رێکەوتی 20ـی ئاداری 2026، یەکەم رۆژی جەژنی رەمەزانی پیرۆز دەبێت لە هەرێمی کوردستان."

جەژنی رەمەزان، یەکەم جەژنی موسڵمانانە لە ساڵنامەی کۆچیدا، کە راستەوخۆ دوای کۆتایی هاتنی مانگی رەمەزانی پیرۆز دێت. ئەم جەژنە تەنیا بۆنەیەکی ئاسایی نییە، بەڵکو پاداشتی پشوودان و خۆشییە بۆ ئەو بڕوادارانەی کە مانگێک بە رۆژوو بوون و پەرستشیان ئەنجام داوە.

جەژنی رەمەزان لوتکەی تەبایی و پێکەوەژیانە، لەم رۆژەدا ئاشتەوایی کۆمەڵایەتی دەگاتە بەرزترین ئاست؛ دڵەکان لە کینە پاک دەبنەوە، خزم، کەس و دراوسێکان سەردانی یەکدی دەکەن و دەستەواژەی "گەردن ئازادی" دەبێتە وێردی سەر زمان. ئەم بۆنەیە دەرفەتێکە بۆ کۆتاییهێنان بە ناکۆکییەکان و دەسپێکردنی لاپەڕەیەکی نوێ لە پەیوەندییە مرۆییەکان.

یەکێک لە جوانترین رەهەندەکانی جەژنی رەمەزان، زەکاتە. ئەم ئەرکە شەرعییە وا دەکات کە هیچ هەژار و دەستکورتێک لە رۆژی جەژندا بێبەش نەبێت لە خۆشییەکان. پێش نوێژی جەژن، بڕواداران هاوکاری دارایی دەگەیەننە نیازمەندان، ئەمەش گیانی هاوکاری و بەرپرسیارێتی کۆمەڵایەتی لەناو کۆمەڵگەدا بەهێز دەکات.

لە لای گەلی کورد، جەژن ڕەنگ و بۆیەکی تایبەتی هەیە؛ لە بەیانییەکەیەوە بە نوێژی جەژن و سەردانی گۆڕستانەکان دەست پێدەکات، پاشان کۆبوونەوەی خێزانەکان لەسەر سفرەی جەژن و خواردنی "قەیسی و برنج و گۆشت" کە نەریتێکی دێرینە. ماڵەکان بە رووی میواندا واڵان و منداڵان بە جلی نوێ و "جەژنانە"وە دیمەنێکی پڕ لە ژیان بە کۆڵانەکان دەبەخشن.

جەژن پەیامی ئاشتییە؛ پەیامی ئەوەیە کە مرۆڤایەتی دەتوانێت لەسەر بنەمای خۆشەویستی و بەخشین کۆببێتەوە. وەک دەوترێت: "جەژن تەنیا پوشینی جلی نوێ نییە، بەڵکو نوێبوونەوەی رۆح و پاککردنەوەی دڵە لە هەموو ئەو غەبارانەی کە ژیانی رۆژانە دروستیان دەکات."