مەسرور بارزانی و شای ئوردن پەرەسەندنە ئەمنییەکان و دۆخی ناوچەکە تاوتوێ دەکەن

سەرۆکی حکوومەتی هەرێمی کوردستان و شای ئوردن، لە پەیوەندییەکی تەلەفۆنیدا دوایین گۆڕانکارییە سیاسی و ئەمنییەکانی ناوچەکەیان تاوتوێ کرد و جەختیان لە پەرەپێدانی پەیوەندییە دوولایەنەکان کردەوە.

ئەمڕۆ چوارشەممە، 18ـی ئاداری 2026، مەسرور بارزانی، سەرۆکی حکوومەتی هەرێمی کوردستان، پەیوەندییەکی تەلەفۆنی لەگەڵ شا عەبدوڵڵای دووەم، شای شانشینی ئوردنی هاشمی ئەنجامدا. 

ماڵپەڕی حکوومەتی هەرێمی کوردستان، لە راگەیەنراوێکدا ئاماژەی بەوە دا، لە پەیوەندییەکەدا، هەردوولا بەوردی تیشکیان خستە سەر دۆخی گشتیی هەرێمی کوردستان، عێراق، ئوردن و ئاڵۆزییەکانی ئەم دواییەی ناوچەکە.

لە تەوەرێکی گفتوگۆکاندا، باس لە پێشهاتە سەربازییەکان و ئەو هێرش و دەستدرێژییانە کرا کە دەکرێنە سەر هەرێمی کوردستان، عێراق و ئوردن. هەردوولا هاوڕابوون لەسەر پێویستیی پاراستنی ئاسایش و سەقامگیری و رێگریکردن لە تەشەنەسەندنی زیاتری ئاڵۆزییەکان کە کاریگەریی نەرێنییان لەسەر بەرژەوەندیی گەلان هەیە.

بەشێکی دیکەی گفتوگۆکە تەرخانکرا بۆ دەرهاویشتە قورسەکانی قەیرانی ئابووری لەسەر ئاستی عێراق و ناوچەکە. لەم چوارچێوەیەدا، سەرۆکی حکەومەتی هەرێمی کوردستان ئاماژەی بەوە دا، کە وەک هەنگاوێکی یارمەتیدەر بۆ سووککردنی باری دارایی و چارەسەرکردنی تەنگژە ئابوورییەکان، حکوومەتی هەرێم رەزامەندیی نیشان داوە بە دەستپێکردنەوەی هەناردەکردنی نەوت لە رێگەی بۆریی نەوتی هەرێمەوە بۆ بەندەری جەیهانی تورکی.

لە کۆتایی راگەیەنراوەکەدا باس لەوەش کراوە، مەسرور بارزانی و شا عەبدوڵڵای دووەم جەختیان لە بەهێزکردنی پەیوەندییە مێژووییەکانی نێوان هەولێر و عەممان کردەوە و ئامادەیی خۆیان بۆ هەماهەنگیی بەردەوام لە بوارە جیاوازەکاندا دەربڕی.

I spoke with HM @KingAbdullahII on security challenges and attacks on Kurdistan Region and Jordan.

We discussed KRG’s decision to allow oil exports through its pipeline to help ease recent economic hardships on Iraq.

We reaffirmed the strong relationship between our nations.

— Masrour Barzani (@masrourbarzani) March 18, 2026