وەزارەتی کارەبا: بەهۆی کێشەیەکی تەکنیکی کارەبا لە سۆران و راپەڕین بڕا
وەزارەتی کارەبای حکوومەتی هەرێمی رایگەیاند، بەهۆی کێشەیەکی تەکنیکی لە هێڵەكانی گواستنەوەی گرفتی کارەبا کوژانەوەی کارەبا لە سۆران و راپەڕین روویدا.
ئەمڕۆ یەکشەممە، 5ـی نیسانی 2026، وەزارەتی کارەبای حکوومەتی هەرێمی کوردستان، هاوڵاتییان ئاگادار دەكاتەوە بەهۆی كێشەیەكی تەکنیکی لە هێڵەكانی گواستنەوەی كارەبا گرفتی كوژانەوەی کارەبا لە ئیدارە سەربەخۆکانی سۆران و راپەڕین روویدا.
وەزارەتی کارەبا ئاماژەی بەوە داوە، تیمەكانی وەزارەتی كارەبا سەرقاڵی لێكۆڵینەوەن لە هۆكاری كێشەکە بۆ ئەوەی بەزووترین كات چارەسەری بكەن و لە چەند كاتژمێری داهاتوودا كارەبا بۆ هاووڵاتیان بگەڕێتەوە.
هەروەها جەخت لەوە کراوە، لەکاتی هەبوونی هەر پێشهاتێکی تر و گەڕانەوەی کارەبا، وەزارەتی کارەبا ڕاستەوخۆ هاوڵاتییان ئاگادار دەکاتەوە.