سەرۆک بارزانی پیرۆزبایی لە عەلی زەیدی دەکات
سەرۆک بارزانی، بە بۆنەی راسپاردنی عەلی زەیدی بۆ پۆستی سەرۆکوەزیرانی عێراق، پیرۆزبایی لێ کرد و هیوای سەرکەوتنی بۆ خواست. هاوکات جەختی لەوە کردەوە، راسپاردنی زەیدی دەرفەتێکە بۆ راستکردنەوەی پرۆسەی سیاسیی عێراق.
رۆژی سێشەممە، 28ـی نیسانی 2026، پەیوەندییەكی تەلەفۆنیی لە نێوان سەرۆك مەسعود بارزانی و عەلی زەیدی، سەرۆکوەزیرانی راسپێردراوی عێراق ئەنجام درا.
بارەگای بارزانی بڵاوی کردەوە، لەو پەیوەندییە تەلەفۆنییەدا سەرۆك مەسعود بارزانی، بە بۆنەی راسپاردنی عەلی زەیدی بۆ پۆستی سەرۆك وەزیرانی عێراقی فیدڕاڵ، پیرۆزبایی لێ کرد و هیوای سەركەوتنی بۆ خواست.
هەروەها سەرۆك بارزانی، راسپاردنی عەلی زەیدی بۆ پۆستی سەرۆكوەزیران، وەك دەرفەتێك بۆ گەڕاندنەوەی پڕۆسەی سیاسیی عێراق بۆ سەر رێگەی دروست هەژمار كرد.
ئێوارەی دوێنێ دووشەممە، 27ـی نیسانی 2026، چوارچێوەی هەماهەنگی، عەلی زەیدی، وەک کاندید بۆ وەرگرتنی پۆستی سەرۆکوەزیرانی عێراق دیاریی کرد.