وەزارەتی نەوتی عێراق: رێككەوتنێكی زۆر باشمان لەگەڵ هەرێمی كوردستان هەیە

گوتەبێژی وەزارەتی نەوتی عێراق گەشبینی خۆی نیشان دەدات سەبارەت بە چارەسەرکردنی دۆسیەی نەوتی هەرێمی کوردستان و رایدەگەیەنێت، گەیشتوونەتە رێککەوتنێکی زۆر باش کە زەمینە بۆ دەستپێکردنەوەی هەناردەکردنی نەوت خۆش دەکات.

سەلیم روکابی، گوتەبێژی وەزارەتی نەوتی عێراق لە لێدوانێکدا بە کوردستان24ـی راگەیاند "لە ئەنجامی گفتوگۆکانی نێوان وەزارەتی نەوت و وەزارەتی سامانە سروشتییەکانی هەرێم و نوێنەری کۆمپانیا نەوتییەکان، رێککەوتنێکی سێ قۆڵی زۆر باش هاتوەتە ئاراوە بۆ بەڕێوەبردنی دۆسیەی نەوت."

سەلیم روکابیراگەیاند، بەرهەمی ئێستای نەوتی عێراق نزیکەی  ملیۆنێک و 500 هەزار بەرمیلە لە رۆژێکدا، بەشێکی بۆ بەکاربردنی نێوخۆیی، وێستگەکانی بەرهەمهێنانی کارەبا بەشێکی دیکەش هەناردەی دەرەوە دەکرێت، لەبارەی زیادکردنی بەرهەمهێنان ئاماژەی بەوە کرد؛ پلانی زیادکردنی بەرهەم و گەیشتن بە ئاستی پێشوومان هەیە بەڵام ئەمە پەیوەیستە بەکردنەوەی گەرووی هورمز، چونکە ئاستی پێشووی بەرهەم نزیکەی پێنج ملیۆن بەرمیل بوو لە رۆژێکدا. 

پەیوەست بە هەناردەکردنی نەوت لە رێگەی بۆریی نەوتیی بەندەری جەیهان، گوتەبێژی وەزارەتی نەوتی عێراق گوتی؛ بڕی نەوتی هەناردەکراو جێگیر نییە بەڵام بە گشتی رۆژانە 150 هەزار بەرمیل نەوت لە هەرێمی کوردستانەوە هەناردە دەکرێت. 

سەلیم روکابی لەبارەی کۆبوونەوە لەگەڵ کۆمپانیاکانی نەوت و پێدانی دڵنیایی ئەمنی ڕایگەیاند، کۆبوونەوەیەک لەسەر ئاستی باڵا لەگەڵ کۆمپانیاکان کراوە و باسی سەرجەم ئەو ئاستەنگ و بەربەستانە کراوە کە لەبەردەم گەڕانەوەی کۆمپانیاکانی نەوتە لە هەرێمی کوردستان بۆ کارەکانیان، لەو کۆبوونەوەیە عەلی زەیدی، سەرۆکوەزیرانی عێراق بەڵێنی بە کۆمپانیاکاندا بەدواداچوون بۆ کێشەکان بکات و چارەسەری پێویستیان بۆ بدۆزێتەوە. داواشی لە کۆمپانیاکان کرد، دەستبەجێ دەست بە کارەکانیان بکەنەوە. 

گوتەبێژی وەزارەتی نەوتی عێراق دەشڵێت؛ لە کۆبوونەوەکەدا، کۆمپانیاکان داوای گرێنتی ئەمنیان کرد، بەر لە هەموو شتێک داواکارییان ئەوە بوو ئاسایشی پێویستیان بۆ دەستبەر بکرێت بۆ ئەوەی دەست بە بەرهەمهێنان و هەناردەی نەوت بکەنەوە. روکابی لەبارەی دانەوەی شایستەکانی ئەو کۆمپانیایانە گوتی؛ لە رێگەی یاسای بودجەی فیراڵی گرێنتی دانەوەی سەرجەم شایستەکان کراوە، بەڵام بە شێوەی سلفە دەدرێتەوە، تاکوو کۆمپانیای راوێژکاریی لە هەڵسەنگاندن تەواو دەبێت و تێچووی بەرهەمهێنان گواستنەوەی نەوت دیاری دەکات،  پاشان لە لایەن وەزارەتی دارایی فیدراڵەوە پرسەکە یەکلایی دەکرێتەوە.