گۆتێرێز داوا لە حووسییەکان دەکات هێرشەکانیان بۆ سەر کەشتییەکان رابگرن

سکرتێری گشتیی نەتەوە یەکگرتووەکان، هۆشداریی توندی دا لە دەستپێکردنەوەی هێرشەکانی حووسییەکان بۆ سەر کەشتییە بازرگانییەکان لە دەریای سوور و داوای هێورکردنەوەی دەستبەجێی گرژییەکانی کرد بۆ پاراستنی هاتوچۆی دەریاوانی.

هەینی، 24ـی تەممووزی 2026، ئەنتۆنیۆ گۆتێرێز، سکرتێری گشتیی نەتەوە یەکگرتووەکان، لە هەژماری فەرمی خۆی لە تۆڕی کۆمەڵایەتیی (ئێکس)، نووسیویەتی: زۆر نیگەرانم بە دەستپێکردنەوەی هێرشەکانی حووسییەکان بۆ سەر کەشتییە بازرگانییەکان لە دەریای سوور و نوێبوونەوەی هەڕەشەکان بۆ سەر ئاسایشی هاتوچۆی دەریاوانی.".

گۆتێرێز دەڵێت: بەردەوامبوونی شەڕ و پێکدادانەکان لە یەمەن دەبێتە هۆی لاوازکردنی دەرفەتەکانی گەیشتن بە ئاشتی، هاوکات دەرئەنجامی توندی ئابووری، مرۆیی و ژینگەیی لەسەر ئاستی ناوچەکە و دەرەوەی لێدەکەوێتەوە.

سکرتێری گشتیی نەتەوە یەکگرتووەکان داوای هێورکردنەوەی دەستبەجێی دۆخەکەی کرد و داوای لە حووسییەکان کرد، کە لە ئەنجامدانی هەر هێرشێکی دیکە یان گرتنەبەری هەر هەنگاوێکی ئاڵۆزکەر کە ببێتە هۆی پەرەسەندنی گرژییەکان، خۆیان بە دوور بگرن.