لە پۆڵەندا تیپی هونەرە میللییەکانی هەولێر بەشداری فێستیڤاڵێکی نێودەوڵەتی فۆلکلۆری دەکات

تیپی هونەرە میللییەکانی هەولێر، وەک یەکێک لە تیپە رەسەن و مێژووییەکانی هونەری نەریتیی کوردی، بەشداریی لە فێستیڤاڵی نێودەوڵەتیی فۆلکلۆری ڤیسوولا دەکات، کە لە شاری پۆڵۆک لە وڵاتی پۆڵەندا بەڕێوەدەچێت.

ئەمڕۆ دووشەممە، 17ی ئابی 2026، سیروان عوسمان، بەڕێوەبەری گشتی رۆشنبیری و هونەری هەولێر بە کوردستان24ی راگەیاند، "تیپی هونەرە میللییەکانی هەولێر، لەم فێستیڤاڵەدا بە پێشکەشکردنی هەڵپەڕکێی کوردی، موزیکی نەریتی، گۆرانی و جلوبەرگی رەنگاورەنگی کوردی، هەوڵ دەدات وێنەیەکی زیندوو لە کەلەپوور و ژیانی کۆمەڵایەتیی کوردان بگەیەنێتە بینەرانی فێستیڤاڵ. لەگەڵ ئەو پێشکەشکردنە هونەرییەدا، ئاڵای پێرۆزی کوردستانیش لەگەڵ تیپەکە دەبێت و بەشێک لە ناساندنی کوردستان لە نێوان کولتوور و نەتەوە جیاوازەکانی بەشداربوو لە فێستیڤاڵەکە دەبێت."

گوتیشی، "بەشداریی تیپی هونەرە میللییەکانی هەولێر تەنیا نمایشێکی هونەری نییە؛ بەڵکو هەلی ناساندنی بەشێک لە مێژوو و کەلەپووری کوردییە لە پلاتفۆرمێکی نێودەوڵەتیدا. هەڵپەڕکێ لە کەلەپووری کوردیدا تەنیا جوڵەی جەستەیی نییە؛ بەڵکو بەشێکە لە ژیانی کۆمەڵایەتی، شادی، بۆنە نەتەوەیی و یادەوەریی کۆمەڵە کە لە نەوەیەکەوە بۆ نەوەیەکی تر گوازراوەتەوە. ئەمجارە ئەو هەڵپەڕکێیە لە هەولێرەوە دەگاتە پۆڵۆک، بۆ ئەوەی لەگەڵ هەڵپەڕکێ و فۆلکلۆری گەلانێکی دیکەدا لەسەر یەک شانۆ پێکەوە ببینرێت."

سیروان عوسمان باس لە گرنگیی ئەو فێستیڤاڵە فۆلکلۆرییە دەکات و دەڵێت، "فێستیڤاڵی نێودەوڵەتیی فۆلکلۆری ڤیسوولا، یەکێکە لە فێستیڤاڵە فۆلکلۆرییە نێودەوڵەتییەکانی پۆڵەندا و لە چوارچێوەی بەرنامەکانی فۆلکلۆریدا، هەڵپەڕکێ، موزیک، هونەر و پیشەسازیی نەریتی و بەرنامە کولتوورییەکان کۆدەکاتەوە. لە بەرنامەکانی ئەمساڵدا، گرووپە بەشداربووەکان لە کولتوور و نەریتە جیاوازەکان، بە پێشکەشکردنی هونەرە میللییەکانی خۆیان، دەرفەتی ئاڵوگۆڕی ئەزموون و نزیکبوونەوەی کولتوورییان دەبێت."

ئەوەشی گوت، "فێستیڤاڵەکە پاش مێژوویەکی درێژ لە بواری فۆلکلۆریدا، لە ساڵانی 1967 تا 1980 بە شێوەی فێستیڤاڵی نیشتمانیی فۆلکلۆر و هونەری گوندی لە پۆڵۆک بەڕێوەدەچوو، پاش ماوەیەکی درێژ، لە ساڵی 2012 بە ناوی فێستیڤاڵی نێودەوڵەتی فۆلکلۆری ڤیسوولا دووبارە زیندوو کرایەوە."

سیروان عوسمان باس لە گرنگیی پەیوەندی نێوان کوردستان و نەتەوەکانی دیکە دەکات و دەڵێت، "لە پۆڵۆکدا، زمانەکان جیاوازن، جلوبەرگەکان جیاوازن و شێوازی ژیانی گەلان جیاوازە؛ بەڵام هونەر دەتوانێت ئەو سنوورانە تێپەڕێنێت. هەڵپەڕکێی کوردی، دەنگی موزیک و گۆرانییە کوردییەکان، بە هاوڕێیی جلوبەرگی نەتەوەیی، دەبن بە زمانێکی هاوبەش بۆ پەیوەندیی نێوان کوردستان و گەلان و نەتەوەکانی دیکە."

دەربارەی گەشتی تیپی هونەرە میللییەکانی هەولێر بۆ پۆڵەندا، سیروان عوسمان دەڵێت، "گەشتی تیپی هونەرە میللییەکانی هەولێر بۆ پۆڵەندا، لە روانگەی کەلەپوورییەوە، تەنیا گەشتێکی هونەری نییە؛ بەڵکو بەردەوامبوونی رێگەیەکە بۆ پاراستن و گواستنەوەی هونەرە میللییە کوردییەکان بۆ دەرەوەی سنوورەکان. کاتێک هەڵپەڕکێی کوردی لەسەر شانۆی پۆڵۆک بەڕێوەدەچێت و ئاڵای کوردستان لەگەڵیدا دەشەکێتەوە، ئەو ساتە تەنیا نمایشکردنی هونەر نییە؛ بەڵکو ناساندنی ناسنامە و کەلەپوورێکە کە بە دەنگی موزیک و جوڵەی هەڵپەڕکێ دەدوێت."

سیروان عوسمان ئاماژەی بەوەش دا، "تیپی هونەرە میللییەکانی هەولێر، لە رێگەی ئەم بەشدارییەوە، کوردستان دەخاتە ناو کاروانی فۆلکلۆریی گەلان و دەرفەتێک دروست دەکات بۆ ئەوەی دەنگی هونەری کوردی لە پۆڵۆک ببیسترێت؛ دەنگێک کە لە هەولێرەوە دەست پێدەکات و بە هەڵپەڕکێ، موزیک و گۆرانی دەچێتە سەر شانۆی جیهان."

تیپی هونەرە میللییەکانی هەولێر لە ساڵی 1979 دامەزراوە و لەو کاتەوە بە بەشداری لە بۆنە و چالاکییە هونەری و کولتوورییەکان، هەوڵی داوە هونەرە میللییەکانی کوردستان بپارێزێت و بە نەوەکانی داهاتوو بگەیەنێت.

فێستیڤاڵی نیودەوڵەتی فۆلکلۆری ڤیسوولا، بڕیارە ئەمڕۆ دووشەممە، 17ی ئابی 2026، بەبەشداری تیپی هونەرە میللییەکانی هەولێر، لە شاری پۆڵۆک لە وڵاتی پۆڵەندا بەڕێوەدەچێت و ماوەی هەشت رۆژ بەردەوام دەبێت.