رۆناڵدۆ وازی لە یاریی نێودەوڵەتی هێنا

کریستیانۆ رۆناڵدۆ وازهێنانی یەکجاریی لە ریزی هەڵبژاردەی پورتوگال راگەیاند و بە ئامارێکی پێوانەییەوە کۆتایی بە کاروانێکی 23 ساڵە هێنا.

ئەمڕۆ پێنجشەممە، 05ـی تشرینی دووەمی 2026، کریستیانۆ رۆناڵدۆ کاپتنی هەڵبژاردەی پورتوگال، لە پەیامێکی ڤیدیۆییدا، لە هەژماری فەرمیی خۆی لە تۆڕی کۆمەڵایەتیی "ئینستاگرام"  ماڵئاوایی لە یاریی نێودەوڵەتی کرد.

رۆناڵدۆ لە پەیامەکەیدا رایگەیاند، دوای 23 ساڵ لە یاریکردن بۆ هەڵبژاردەی وڵاتەکەی، کاتی ئەوە هاتووە درێسی ژمارە حەوت رادەستی نەوەی داهاتوو بکات. ئەو یاریزانە باسی لەوە کرد، بڕیارێکی ئاسان نەبووە و بە دڵ بڕیارەکەی داوە نەک تەنیا بە مێشک.

ئەو ئەستێرەیە ئاماژەی بەوە دا، هەمیشە هەوڵی داوە باشترین بێت و مێژوو دروست بکات. هەروەها سوپاسی هاندەران، راهێنەران و خێزانەکەی کرد بۆ ئەو پشتگیرییەی لە ماوەی کاروانە وەرزشییەکەیدا لێیان کردووە. لە کۆتاییدا جەختی کردەوە، لەمەودوا وەک هاندەرێک سەیری یارییەکانی هەڵبژاردەی پورتوگال دەکات و هەمیشە وڵاتەکەی لە دڵیدا دەمێنێتەوە.

رۆناڵدۆ لە ماوەی 23 ساڵی رابردوودا بەشداری لە 234 یاریی نێودەوڵەتیدا کردووە و توانیویەتی 146 گۆڵ بۆ هەڵبژاردەی پورتوگال تۆمار بکات، بەمەش بووەتە گۆڵکاری مێژوویی یارییە نێودەوڵەتییەکان لەسەر ئاستی جیهان و خاوەنی گەورەترین ئامارە.

کریستیانۆ رۆناڵدۆ لە ئابی 2003 یەکەم یاریی نێودەوڵەتیی خۆی بە درێسی پورتوگالەوە ئەنجام دا. لە ماوەی کاروانە وەرزشییە درێژەکەیدا، ئەو یاریزانە رۆڵی سەرەکی هەبوو لە بەدەستهێنانی یەکەمین نازناوی گەورە بۆ وڵاتەکەی، ئەویش جامی نەتەوەکانی ئەوروپا بوو لە ساڵی 2016، لەگەڵ بردنەوەی خولی نەتەوەکانی ئەوروپا لە ساڵی 2019. هەروەها تاکە یاریزانە لە مێژوودا بەشداری لە شەش جامی جیهانیدا کردبێت. بڕیاری وازهێنانەکەی رۆناڵدۆ لە دوای بەشداریکردنی لە جامی جیهانیی 2026 دێت، بەمەش کۆتایی بە سەردەمێکی زێڕین لە مێژووی تۆپی پێی پورتوگال و جیهاندا هێنا.