Çarşembî ya dahatî Perlemana Kurdistanê yasaya serokatîya Herêmê pesind dike
Roja Çarşembî ya dahatî, perlemana Kurdistanê dicive bi armanca dengdanê li ser pêşnîyaza hevwarkirina yasaya serokatîya Herêma Kurdistanê.
K24- Hewlêr
Roja Çarşembî ya dahatî, perlemana Kurdistanê dicive bi armanca dengdanê li ser pêşnîyaza hevwarkirina yasaya serokatîya Herêma Kurdistanê. Serokê Firakisyona Partîya Dîmukratîya Kurdistanê (PDK) jî aşkere dike, ku piştî hilbijartina serokê Herêma Kurdistanê Firakisyona PDKyê bi zûtirîn dem navzedê berbijêrê PDKyê dihê raspartin bo pêkanîna hikumetê. Perlemantarek jî aşkera dike, berî cejna Remezanê kabîneya nû dê pêk bihê.
Roja Çarşembî ya dahatî, perleman dê kombûna xwe saz bike bi armanca dengdanê li ser pêşnîyaza hevwarkirina yasaya damezraweya serokatî Herêma Kurdistanê. Serokê firakisyona PDKyê aşkera dike, ku piştî hilbijartina serokê Herêma Kurdistanê , firakisyona wan di perlemanê de, Mesrûr Barzanî kandîd dike bo pêkanîna kabîneya nû û serokê Herêma Kurdistanê, mersûma serokatîyê bo vê yekê diderxîne û di dema sî rojan de kabîneya xwe dihîne di perlemanê de.
Ûmêd Xoşnaw, serokê firakisyona PDKyê di perlemana Kurdistanê de degot: Perlemantar li benda gehiştina banghêştina rûniştina perlemanê ne. Di wê rûniştinê de gotûbêj nahê kirin li ser pêşnîyaza hevwarkirina yasayê tenê ewê yasayê dixin dengdanê .
Perlemantarek dî aşkera dike sazana alîyan giringe û pêşbînî dike berî Cejna Remezanê Kabîneya nû ya hikumeta Herêma Kurdistanê bihê pêkanîn.
Aydin Meirûf, serokê Firakisyona Turkumanan, dibêje: Renge berî Cejna Remezanê hikumeta nû bihê pêkanîn.
Li gor zanyarîyên Kurdistan24ê, Komîteya yasayî pêşnîyaza YNKyê bo zêdkirina cêgirerk din bo serokê Herêmê hatîye çespandin û radestê desteya serokatî ya Perlemanê hatîye kirin.