Mesrûr Barzanî û şandeke leşkerî ya bilind a Brîtanî rewşa navçeyê guftûgo dikin
Serokwezîrê Herêma Kurdistanê Mesrûr Barzanî ligel şandeke bleşkerî ya bilind a Brîtanya çend pirsên girîng guftûgo kirin .
K24 – Navenda Nûçeyan
Serokwezîrê Herêma Kurdistanê Mesrûr Barzanî ligel şandeke bleşkerî ya bilind a Brîtanya bi serokatiya Şêwirmendê Bilind ê Leşkerî yê Brîtanya li Rojhilata Navîn û Bakurê Afrîqya Sir John Gordon Lorimer çend pirsên girîng guftûgo kirin û tekez kirin, ku aloztirkirina zêdetir a rewşa navçeyê, encamên nerênî û nexwastî yên ewlehiyê û mirovî jê derdikevin.
Di hevdîtinê de ku Konsolê Giştî yê Brîtanyayê li Hewlêrê James Thornton amade bû, rewş û pêşhatên meydanî yên Iraq û Sûriyê hatin guftûgokirin. Tekezî li wê hat kirin, ku şer û tundûtûjî ne di berjewendiya ti aliyekî de ye û pêwîst e bi guftûgo pirsgirêk bêne çareserkirin. Herwiha amaje bi wê jî hat kirin, ku aloztirkirina zêdetir a rewşa navçeyê, encamên nerênî û nexwastî yên ewlehiyê û mirovî jê derdikevin.
Di civînê de herwiha guftûgo derbarê guhartinên Iraqê de jî hatin kirin û tekezî li çareserkirina bingehîn a pirsgirêkên Herêma Kurdistanê û Hikûmeta Federal a Iraqê hat kirin, ji ber ku ew di berjewendiya hemû xelkê Iraqê de ye.
Şanda mêvan pesnê pêngavên Hikûmeta Herêma Kurdistanê da, bo encamdana çaksaziyê di dam û dezgehên hikûmî de, bi taybetî jî di Wezareta Pêşmerge de.
S. B