Li Şingalê kadroyekî PDKê hat terorkirin
Ehmed Husên Hemed duh hatiye revandin û îro termê wî li sînorê Sinûnê hat dîtin
Şingal (K24) – Kadroyekî Partiya Demokrat a Kurdistanê (PDK) yê bi navê Ehmed Husên Hemed duh hatiye revandin û îro termê wî li sînorê Sinûnê hat dîtin.
Nûçegihanê K24ê yê li Şingalê ragihand; Ehmed Husên Hemed kadroyekî Partiya Demokrat a Kurdistanê (PDK) bû û li Lijneya Xansor a PDKê dixebitî.
Nûçegihanê me eşkere kir; termê wî li sînorê nahiya Sinûnê, di navbera komelgeha Dûgirê û komelgeha Dihola de hatiye dîtin.
Çavkaniyekî ewlehiyê li nahiya Sinûnê ji K24ê re ragihand; çendîn gulle di laşê Ehmed Husên Hemed de hene.
Malbata Ehmed Husên Hemed eşkere dike ku ti pirsgirêkeke wî ya civakî bi ti kesekî re tunebû û guman dikin ku sedema revandin û kuştina wî, siyasî be.
Termê Hemed bo tiba dadî hatiye veguhestin û malbata wî li benda raporta bijîşkan û wergirtina termê wî ne.
